صلاتى حياتى

[hanooda]

صلاتى حياتى

السلام عليكم ورحمه الله وبركاته

انا قولت اجى اكتب قصتى مع الصلاه والقران عشان اقولكوا احساسى
احترت كتير اكتب الكلام ده ولا لا , قولت اكتبه وامرى لله
انا من عائله يعنى حالها كويس جدا ومش محتاجين حاجه الحمد الله
كنت وانا صغيره اوى كنت بحب الضحك اوى واللعب بطريقه فظيعه جدا
بس كانت ماماتى معودانى انى اهتم بدراستى اوى ولما كنت صغيره كان بتقولى اعمل زيها ف الصلاه
وانا كنت بعمل زيها بالظبط كان جوايا انى بعملها عشان ماما وهى كانت بتقولى عشان ربنا يدخللك الجنه وانا اقولها حاضر يا ماما بس جوايا عشانها هى عشان هى تتبسط منى
وف القران كانت برده بتقولى اذا حفظت سوره من القران تدينى جنيه والسنه الى بعدها الجنيه يبقى 5 جنيه وانا ببقا مبسوطه عشان انى بحفظ وباخد فلوس على حفظى انا حفظت 15 جزء من القران وانا صغيره كنت فرحانه اوى بس عمرى ما حسيت بحلاوه صلاتى وقراتى للقران خالص
لما كبرت شويه بقا اهتمامى كله ف دراستى كنت بحب الدراسه اوى وبذاكر وبجيب درجات جميله اوى والبيت يفرح كان الاسلام بالنسبالى الحجات الاساسيه بس حسنات وسيئات
وحسنات هنخش الجنه وسيئات هندخل النار وعذاب النار وعذاب القبر عارفه الحجات دى
وعارفه ان الى مش بيصلى ويعبد ربنا ايه الى بيحصل له وللاسف برده الكلام مش جاب معايا نتيجه والى انا عرفته مش عملت بيه ده انا بالعكس اسمع اغانى واتفرج على افلام واخرج
والصلاه لما كبرت بطلت اقلد ماما او بابا وقراتى للقران بطلتها من زمااااااان لدرجه انى مش حافظه ف قرانى لحد اللحظه الى انا بكتب فيها غير سوره الكهف لانى بحبها جدا ويمكن كل يوم جمعه اشغلها على الكمبيوتر بتاعى , كنت ساعات لما ادخل البلكونه وابص على السما واتامل
الاقى صوت بيكلمنى ويقولى انتى مش بتصلى ليه بدل ما تعدى تلعبى وتخرجى وتعدى على النت بالسعات صلى الفروض الى عليكى , دى الصلاه الواحده هتعد معاكى 5 دقائق يعنى 25 دقيقه ف اليوم ليه مش بتصلى , لدرجه انى سمعت كلام الصوت الى جالى ده وجربت اصلى بس للاسف
وانا بصلى بفكر ف حجات كتير زى اخويا هيعزمنى فين النهاره , هاكل ايه , هكلم مين
مش بصلى ف خشوع يعنى لدرجه انى قولت انا كده بغضب ربنا اصلا لما افكر ف الحجات دى وانا بصلى , لما ابقا مش افكر ف الحجات دى هصلى , وبطلت اصلى بس مش بطلت ادخل البلكونه
وكل يوم الصوت بيكلمنى وينصحنى الصلاه الصلاه الصلاه وانا بسمعله بس مش بعمل بيه
وكل شويه يخوفنى من النار , وكل شويه اقول انا كده كده ربنا هيهدينى بس مش الوقتى لما ابقا اكبر شويه انا لسه صغيره لازم اعيش حياتى كويس واتمتع بالدنيا اكتر
والى كان مسهلنى ف ده ان كل حاجه عندى ومش ناقصنى حاجه
بس جوايا حاسه ان ف حاجه غلط كنت اعده افكر
وانا صغيره كان فيه الحافز الى خلانى اصلى واقراء قران الفلوس وانبساط ماما
لكن الوقتى معتش الكلام ده انا كبرت كنت عاوزه حافز اكبر وكنت مستنياه
وف يوم لقيت الحافز ده طبعا حضرتكوا عارفينه الحافز ده الى خلانى اشترك هنا وجابنى هنا
الحافز ده الى ضيع منى صحبتى الحافز ده الى خلانى افوق واعرف انا مين
من بعد اليوم ده وانا الحمد الله مش بطلت صلاه واصلى واعيط وف خشوع لربى
وادعيله ان يهديلى صحبتى اعدت اقرا قران كتير حتى انى دخلت المنتدى هنا ودخلت منتدى اتباع مرسلين ودخلت شوفت حجات ف الاسلام كانى بتولد من جديد والشيخ حازم شومان سمعتله من قلبى بجد وحسيته قولت لازم اتغير هو ده الحافز ليا عاوزه اصلى عشان ربنا عشان بحبه عشان طمعانه ف رضاه عليا ادعت اقرا واتعلم ولسه هشوف حجات كتير
بفرح اوى اوى لما الاقى حد مسيحى بيدور على الحق من قلبه وينتهى باسلامه
وبدعى واقول يا رب
الوقتى دوت حلاوه الصلاه حسيتها دوت سماعى للقران وشوفت اد ايه
احلى كلام واد ايه اجمل وارقى كلام ف الدنيا القران الكريم
الوقتى حسيت بكل ده وف الوقت ده الصوت جالى ويقولى شوفتى اد ايه انتى كنتى غلطانه
شوفتى طعم الحياه اد ايه هى جميله , وبيقولى كمان العب وافرح واتبسط بس الا الصلاه وغضب ربنا عليا الا
وبجد انا حسيت انى مرتاحه من جوه
والحاجه الى نقصانى معتش خلاص حاجه نقصان
اكتشف ان الصلاه وقربى لربنا ده الى نقصنى والحمد الله بجد وربنا يهديكى يا صحبتى
زى ما ربنا هدانى ونورى طريق وبجد عاوزه اقولها انى بحبها عشان هى السبب
انى اكمل الى نقصنى وانى اقرب لربنا
ويا رب هى كمان تقرب زى ماا انا قربت

الصلاه دى حياتى وانا اسفه انى مش كنت
بقضى واجبى فيها واسفه انى كنت مش مهتميه بكتاب ربنا
واسفه انى كنت كده

والحمد الله انى مسلمه
وبجد يمكن انتوا ليكوا فضل عليا كبير
لما لقيت اهتمامكوا بيا وبصحبتى واد ايه ف ناس كده
بجد والله انا مبسوطه انى معاكوا


اختكم ف الله
هند

للمزيد من مواضيعي