ابوالسعود والشيخ اسامه عبد العظيم

[ابوالسعودمحمود]

ابوالسعود والشيخ اسامه عبد العظيم

ابو السعود والشيخ اسامه عبد العظيم

ابو السعود والشيخ اسامه عبد العظيم

حكايه من حكاياتى اللى مبتخلصش


احد الاخوه جزاه الله خير قال لى ياابو السعود متيجى معانا نصلى ورا الشيخ اسامه عبد العظيم

كنا اول يوم فى رمضان وانا بصراحه اصعب عباده عليا هى الصيام باصوم بالعافيه رمضان فقط

وبتبقى عينى فى وسط راسى طول اليوم

لانى متعودتش عليه من صغرى فتعبت لما كبرت

المهم رحت معاه وكان المسجد فيه شويه شغل كان الدور التالت فيى بقايا مواد بناء من زلط ورمل وخلافه

فالاخوه كانوا بيرفعوا الحاجات دى فوق السطح وهما صائمين

وانا مفيش فى دماغى الا الاكل امتى المغرب هياءذن على شان اسكت الثعبان اللى فى بطنى وعمال يتلوى وعايز اسكته

المهم الاخ منير اللى خدنى معاه قال لى قوم سلى صيامك واشتغل معانا فقمت على مضض لانى مش قادر ويعلم الله مابى من مشقه

المهم الاذان اذن وانا من عادتى احسن واحد يطبق حديث النبى عليه الصلاة والسلام

فى تعجيل الفطور وتاءخير السحور

يعنى المؤذن يقول لفظ الجلا له ( الله ) اكون انا شغال طحن فى الاكل

المهم اول الاذان مااذن جريت تحت على صحن المسجد على شان اكل

لقيت يامحترم مفيش غير بلح خبطت ييجى كام بلحه وشربت وبعدين قلت لمنير فين الاكل

قال لى بعد الصلاه اتصدمت وقلت فى نفسى مفيش مشاكل اهى مره وعدت

جينا بقى للصلاة

الصلاة اللى انا متعود عليها ان الامام يقراء سوره من السور العشر الاواخر على مرتين ونكون بره

لقيت الصلاه هنا مختلفه بهدوء وبراحه وسور متوسطه وكامله

خلصنا الصلاة ونزلنا اكلنا فى البدروم تحت وبعد كده انا حل على التعب وعايز انام مش قادر اصلب طولى

استحملت وجاهدت نفسى وقلت اصلى العشاء واتخمد فى مكان تحت فى البدروم والترويح بعدين بقى مع نفسى لما افوق

العشاء اذن ان حد يقيم الصلاه مفيش صلاينا ركعتين سنه ومفيش حد عايز يقيم الصلاه

عندنا الاذان والاقامه بعد بمفيش نظام تيك اوى حاجه سريعه كده

فقلت فى نفسى اقول قيم الصلاه للاخ اللى اذن وبعدين لقيت كله ساكت المهم قعد نا حوالى نصف ساعه وبعدين اقاموا الصلاه

كنت انا بقى خلاص جبت من الاخر

خلصنا الفرض ولسه هخلع وانزل انام تحت قفشى عمك منير

راااااااااااااايح فين ياابو السعووووووووووووووووووود

قلت له تعبان وهنزل انام تحت قال لى وتسيب الصلاه ورا الشيخ قلت له ربنا يسامحنى بقى لايكلف الله نفسا الا مااتاها

قال لى لالا اصبر نفسك مع الذين يدعون ربهم بالغداة والعشى يريدون وجهه

المهم صبرت نفسى وقاموا لصلاة التراويح

سمعت قران وكائنى لم اسمع القران قبل ذلك الشيخ صوته فيه خشوع وجمال واخلاص عجيب

المهم يامحترم

دخلنا فى الربع التانى من البقره على ما افتكر وخلاص بقى مش قادر رغم حلاوة التلاوه

فقلت اقعد رحت قاعد اخونا منير بقى ربنا يهديه مش يخليه فى حاله ويطلعنى من نافوخه

لاء راح ماسكنى من كتفى واقامنى فى الصف اتغظت منه بصراحه وقلت اخبطه بالكوع

على شان متكلمش فى الصلاة ويفهم انى مش قادر اقف المهم وقفت كام ايه ورحت قاعد تانى

راح اخونا منير مكرر تانى وقفشنى من كتفى بقوه كان هيخلعه

وقفت تانى شويه وخلاص بقى فاض بى الكيل والشيطان حدثنى لو عمل كده تانى انا هضربه

المهم قعدت ولسه بيمسكنى من كتفى علشان اقوم ورحت ناطر ايده وباصص له وقلت بصوت عالى جرى ايه يامنير مش قادر اقف يااخى

ورحت خارج من الصف ورجعت ورا ونمت صحيت ع الفجر

صليت الفجر وبعد الصلاه الشيخ والاخوه عملوا الاذكار

وبداءوا يلتفوا حول الشيخ لبعض اسئلتهم

انا كان عندى سؤال قلت فرصه لما اسئله

طبعا الزحام شديد والاخوه كلهم من تلاميذ الشيخ ومتعرفش تاخد فرصه لتسئله

وانا زى الاعرابى وسطهم رحت مزاحم وداخل عليه وسئلته نصف السؤال

ولسه لم اكمل لان الناس زحمه فما كان من الشيخ الا ان ظل ينظر الى ولم يرد على اى واحد من تلامذته ويقول لى اكمل انا اتخضيت من الموقف ومعرفتش اكمل السؤال والشيخ واقف ومستنى انى اكمل ولم يلفت وجهه عنى طرفة عين وكائن المسجد ليس فيه احد الا ابو السعود
من ساعة هذا الموقف وانا احب هذا الشيخ فى الله ولله

للمزيد من مواضيعي