[الليث الضاري]

ما شاء الله لا قوة إلا بالله

أنقل إليك أخي الحبيب وقائع أول صلاة لأخونا الحبيب (حبيب حبيب) الذي كان مشرفا في منتديات النصارى ثم من الله عز وجل عليه بالإسلام منذ سنة تقريبا

وكانت أول صلاة له في المسجد هي صلاة العشاء

اقتباس وليا عندكم خبر حلو انا اخدت بعضي وروحت في اخر الدنيا وسافرت محافظة تانية جنب محافظتنا يعني بس قلت اروح بعيد شوية دخلت على جامع كبير اوي في البلد دي وحطيت على ايدي رباط ضغط زي ما اختنا السراج الوهاج قالت ودخلت الجامع ده وكان فيه درس بيتكلم عن شهر رجب وحاجات كتير حلوة اوي سمعتها وكنت اول مرة اسمعها ده الدين الاسلامي طلع غني جدا يا جماعة يعني مش قران واحاديث بس زي ما كنت فاكر ده في كلام كتير اوي الواحد مكانش عارفه يعني الواحد كان مركز بس على الشبهات وبقرا فيها وعمري ما قريت في الحاجات الحلوة اللي بينادي بيها الدين ما علينا انا حضرت الدرس وسمعته والشاب اللي كان بيقول الدرس كان راجل واضح انه مثقف وعقله واسع وحبيته كده كأنه واحد من اعضاء البشارة وبعد الدرس قلت اروح اكلمه واعمل بنصيحتكم واشوفلي صديق مسلم يعلمني الدين كده بث مباشر على الهوا ههههههه لكن الدرس خلص من هنا ولقيت الناس اتلموا على الشيخ ونزلت الاسئلة ترف عليه وهو يخلص من واحد يلاقي واحد يخلص من واحد يلاقي واحد انا قعدت في الأرض قلت هوه حيفضالي؟ ده حيخلص على الشهر اللي جاي على كده فضلت مستني لحد ما الناس خلصت كلام معاه ومشيوا كلهم روحت داخل عليه اول حاجة عملتها لقيتني بابكي لوحدي من غير كلام هداني وقالي مالك واحدة واحدة كده لحد ما هديت وروحت حكيتله حكايتي من أول سفالة حبيب وقذارة لسانه لحد اسلامه وحكيتله على المناظرة والكلام اللي قريته فيها فرح بيا جدا وبكى هو كمان من الفرحة وطبطب عليا وقالي انا من دلوقتي خدامك وعلى فكرة بيبعتلكم السلام واحد واحد من غير ما يعرفكم المهم انا لما لقيته اتأخر في الجامع قلتله روح انت على بيتك وحابقى اجيلك يوم تاني مرضيش وقالي لا انا مش حاسيبك انا حافضي نفسي عشانك وخدني على بيته وآمن يدخلني بيته ومخافش مني المهم اتصلت بأهلي في البيت وقلتلهم انا بايت عند واحد صاحبي متقلقوش عليا وبيتني معاه في البيت وفضل بقى يكلمني عن الاسلام وفضل صاحي وعينه كلها نوم لكن فضل صاحي معايا منامش شرحلي حاجات كتيرة اوي وبقى يعلمنى ازاي انفذها عملي ومروحناش شغلنا يومها ولا انا ولا هوه وقضينا اليوم على كده مش عايز اقولكم الفرحة اللي كانت ماليه عنيه وقلبه وهو بيعلمني يعني كأنه كان عنده عيل من عياله تايه ولقاه بعدها اتغدينا وشربنا الشاي وقالي انا مستنيك كل يوم هنا تيجي اعلمك في دينك زي انهاردة كدة قلتله مينفعش كل يوم عشان شغلي واتفقت معاه اني حاروحله يومين في الاسبوع اقضيهم معاه لحد ما اسافر اكون اتعلمت الدين صح ومن شيخ كمان وخريج ازهر وحافظ القران كله وحافظ احاديث كتير وبيرد على اي سؤال يعني راجل عالم ربنا يبارك فيه ويجازيه خير اقتباس بس قول لي يا حبيب القلب إنت الدرس اللي حضرته ده كان بعد صلاة العشاء ... مش كده؟؟؟ ممكن توصف لنا إحساسك وإنت بتصلي العشاء مع الجماعة كان إيه؟؟؟ وتقدر تفتكر الآيات اللي قرأها الإمام كانت بتتكلم عن إيه؟؟؟ انا دخلت اتوضيت ووقفت معاهم بقيت اقلدهم وانفذ الحاجات اللي اتعلمتها من الروابط اللي اديتوهالي والفيديوهات وبالنسبة للسورة اللي كانت بتتقرا في الصلاة كانت سورة الرحمن وكان احساس جميل جدا وفرحت جدا لما قال الرحمن علم القرآن القرآن اللي كان سبب اسلامي وافتكرت ساعتها المناظرة والاعجاز العلمي اللي شرحتهولي فيها بقت الدموع تنزل من عنيا كده لوحدها ولما قال علم القرآن خلق الانسان علمه البيان بقى قلبي يقول انت الإنسان اللي الآية دي بتتكلم عنه وربنا علمك القرآن بعد ما كنت جاهل ولما قال الشمس والقمر بحسبان افتكرت الاعجاز العلمي اللي قاله ذو الفقار في المناظرة عن الشمس والقمر ولما قال والنجم والشجر يسجدان قلت بقى الشجر كان بيسجد يا حبيب وانت لا؟ الشجر الخشب بيسجد وانت بتسب وتشتم؟ ولما قال والأرض وضعها للأنام افتكرت اعجاز الجبال اللي قريته في المناظرة يعني بقيت اسمع كلمة من الشيخ في القرآن احس انها كتاب لوحدها والكلام ده محسيتهوش الا لما قريت واتعلمت وفهمت مع اني كنت باقرا في القرآن قبل كده وقلبي عليه قفل مصدي لا بيدق ولا بيتحرك بس لما نفهم القرآن فعلا ونحس بمعانيه ونشوف معجزاته بيكون له طعم تاني خالص وانت بتقراه ومن روعة إحساسي قررت احفظ السورة دي وحفظت منها اول صفحة وبقيت كل شوية ارددها في سري عشان احس نفس الإحساس ده ياااااااااااااااه ده انا كنت ميت وصحيت صدقوني مش بابالغ كنت ميت فعلا وحاسس ان اول مرة قلبي يدق ويتحرك كمان اكتر حاجة دخلت قلبي كلمة امين لما سمعتها الجامع كله بيقولها مع بعضه وناس كتيرة وصوت زلزل المكان كده وكان زحمة هزتني من جوة وخليتني ادمع وجسمي قشعر كده مش عارف ليه وبقيت ادعيلكم وانا باسجد لانكم قلتولي ان اقرب وقت بيكون الانسان قريب من ربنا وهو ساجد فدعيتلكم كتير كتير اوي عشان انتو السبب اللي خلاني احس الاحساسات دي اللي عمري ما دقتها وكنت ممكن عمري يعدي واموت من غير ما ادوقها بس ده احساسي باختصار بس بعد ما اتقرأت السورة ودعيت في السجود وبعد ما قمت من السجود كنت باعمل حاجة تكسف اوي كنت باتلخبط مكنتش مركز في حركات الصلاة كان دماغي فاللي بقيت فيه والتحول اللي حصل في حياتي وشخصيتي بقوا همه يقعدوا وانا اقوم مع نفسي واروح قاعد تاني يجوا بعد كده يقوموا همه الاقيني انا قاعد بردو كده مع نفسي واروح قايم تاني لما الاقيهم قاموا جيت اسلم روحت مسلم على الشمال الاول لقيت وشي في وش اللي جنبي ولما دورت وسلمت على اليمين لقيت وشي بردو في وش اللي جنبي وبقيت محرج جدا وكل اللي جنبي لاحظوا اني مدخلتش جوامع قبل كده فلقيت اللي جنبي كلموني وعرفوني ونصحوني ربنا يجازيهم خير وقالولي على الغلطات اللي غلطها وفهموني قالولي انت أول مرة تصلي والا ايه ؟ قلتلهم اه مكنتش باصلي وقررت اصلي فمتلخبط شوية وعدت على خير بس حاجة تضايق اني مش حاعرف اعيش اللحظة دي كل يوم زي المسلم كده خمس مرات بينزل يقف الوقفة دي بين اخوانه وكلهم واحد مفيش فرق بين واحد وواحد لا وزير ولا غفير ومحدش له دعوة باللي جنبه انت واقف مع ربنا ومركز ومفيش نفس ولا صوت ترمي الابرة على الأرض ترن برغم العدد الكبير جدا وكله واقف انتباه يعني باطلب انكم تدعولي اسافر واعيش في بلد اقدر اعمل فيها الحاجات دي براحتي من غير ما اكون مداري من عيون حد

المزيد من مواضيعي

فتاة رومانية في العاشرة من عمرها تضع طفلا بصحة جيدة في إسبانيا

المرأة التي صارت عمود ملح !

أيهما نصدق؟ (أول من قام من بين الأموات)

حكايتنا كلنا ... حكاية كل يوم

زيوس ويهوه وجهان لعملة واحدة

فضيحة المنافق صليب متى ساويرس

إحنا بتوع المحبة

عزاء لنصارى مصر في قتلى قنا