تفريغ : درس (( مستنية إيه ؟! )) بالعامية - د.حازم شومان

[طائر السنونو]

http://montada.rasoulallah.net/uploads/monthly_09_2010/post-4072-12845108236858.png

السلام عليكم ورحمة الله و بركاته ، الحمد لله وكفى ، وصلاة وسلاما على عباده الذين اصطفى ،ثم أما بعد
http://www.way2allah.com/media/banner/0/93.gif

هل إنت مستعد للحساب ؟

لما بنيجى نقول يا جماعة إن يوم القيامة خمسين ألف سنة ، إيه الخواطر اللى بتيجى فى ذهنك لما تسمع كلمة خمسين ألف سنة ؟! خمسين ألف سنة ده إنت عمرك بعد ما تشيل منه النوم ، و بعد ما نشيل منه ال 15 سنة اللى إنت كنت لسة مبلغتش فيهم ، و بعد ما نشيل منهم الأكل والمواصلات ووو مش هيفضل فيه خمسين ألف ساعة

فتخيل إنك هتتحاسب على خمسين ألف ساعة فى خمسين ألف سنة ، تخيل إنك إنت هتتحاسب على الساعة فى سنة يا أخى الكريم

يعنى عايزين يا جماعة نفكر فى الموضوع ده من زاوية إيه ؟ إذا كنت فى الدنيا بتاخد سنة كاملة تستعد فيها عشان تدخل لجنة امتحان ساعة ، إنت فى الأخرة كل ساعة خدتها فى الدنيا بتدخل فيها لجنة امتحان سنة يوم القيامة ، خمسين ألف سنة ، ده من يوم ما سيدنا آدم نزل على الأرض لغاية دلوقتى مجاش سبع تمن تلاف سنة ، يعنى إنت هتقف يوم القيامة أطول ممن يوم ما سيدنا آدم نزل على الأرض لغاية دلوقتى ، بل أطول يعنى مرات مرات عديدة يعنى الدولة الفرعونية تلاتين أسرة و الدولة الإسلامية العباسية و العثمانية و الأموية و القرن ال19 و القرن العشرين بكل الأحداث بتاعتهم ، كل ده ميجيش حاجة فى خمسين ألف سنة

و تيجى فى الآخر بعد ما الواحد روحه تطلع ، هو لسة أد إيه ؟ فواحد يقولك هانت خلاص معدتش غير 100سنة 100سنة بس و نخلص الحمد لله ده قربت ، خمسين ألف سنة يا جماعة إنتظار ده ، لو اتقال لك إنت بعد الخمسين ألف سنة دول رايح الجنة برضه عذاب الإنتظار هيزلزلك فى المدة ده ، هى بل فى لحظة ...لحظة ما هيتحدد مصيرك لحظة ما الكتاب هيتطاير ليمينك ولا يسارك أو شمالك و العياذ بالله ، لحظتها الرعب اللى هدوقوه يعنى أقصى لحظة رعب و إنتظار دوقتها فى الدنيا كإن إمتى ؟

واحد قريبك وحبيبك أوى دخل عمليات فى حادثة و إنت مستنى يطلعوا يقولوا يا مات يأما ربنا أنقذه ، أو مثلا واحد طلعله ورم قريبك أو حبيبك أو إنت و قالوا ده ممكن يبقى ورم خبيث و خدوا عينة يحللولها و مستنى نتيجة التحليل تطلع حميد ولا خبيث ، إيه اكتر لحظة ؟ قضية يا يطلع اعدام يا يطلع مؤبد يروح فيها العمر ، يا يطلع براءة إيه أخطر لحظة إنتظار عشتها فى حياتك ؟ كل ده ولا حاجة فى لحظة إنتظار كتابك هتخده بيمينك ولا بشمالك

لو الموضوع كدة يا جماعة يبقى لازم نحسبها صح ، لازم نحسبها صح بالذات إنتى يا أختى لازم تحسبيها صح لإن الرسول - مش إنا - عليه الصلاة والسلام قال "فإني أريتكن أكثر أهل النار" صحيح أكثر أهل النار من إيه ؟ من النساء ، اللى هيعدوا عالصراط من كل ألف واحد 999 هيقعوا وواحدة ، أكثر ال999 دول إيه ؟ من النساء ، يبقى لازم إنتى بالذات تحسبيها صح مستنية إيه ؟! عايزين يا جماعة معلش عايزين الليلة لإن الأخوات فعلا عايزين وقفة إنتى مستنية إيه ؟!


يتبع بإذن الله ...

http://img393.imageshack.us/img393/9825/11111111111wt7.gif

[طائر السنونو]

مستنية إيه من دنيا ؟

ربنا قال عليها "وَمَا الْحَيَاةُ الدُّنْيَا إِلاَّ لَعِبٌ وَلَهْوٌ وَلَلدَّارُ الآخِرَةُ خَيْرٌ لِّلَّذِينَ يَتَّقُونَ أَفَلاَ تَعْقِلُونَ"الأنعام:32مستنية إيه من دنيا ؟!!...الرسول عليه الصلاة والسلام قال عليها "ما لي وما للدنيا ، ما أنا في الدنيا إلا كراكب استظل تحت شجرة ، ثم راح وتركها" صححه الألبانى ...مستنية إيه من دنيا؟ الرسول قال عليها :" لو كانت الدنيا تعدل عند الله جناح بعوضة ما سقى كافرا منها شربة ماء " صححه الألبانى

مستنية إيه من الدنيا ؟ إيه اللى إنتى منتظراه ؟ يعنى أحد الشباب بيشتغل هو فى المعازف - ربنا يتوب عليه - شاف رؤيا من عدة أيام ، إن هو يعنى كإنه مات هو فى الرؤيا ، إن هو مات و الناس خلاص بتكفنه و بتدفنه ، و هو حاسس بكل اللى حوليه ، بس مش قادر ينطق ، و بعد كدة حفروا له حفرة و بيدفنوا فيها !

بيقول لما دخلوه الحفرة و ردموا عليه ، ما هواش قادر يتكلم ! فبدأ يبص حواليه لقى جثث و جماجم وهياكل عظمية على يمينه وشماله ، فبقى مرعوب شوية ، بيقول خلاص ! استسلم ده ، كل ده فى الرؤيا ، استسلم للأمر الواقع إنا مت خلاص ، شوية ولقى منكر ونكير جوله ، طبعا هذا الشاب لم يكن متوقع إنه يشوف رؤيا زى دى أبدا ليه ؟

ده هو بيشتغل فى المعازف ، يا جماعة يعنى مش قرأ قرآن و نام شافها ، لااا ده هو مش فى دماغه هذه الأحداث أصلا ، بيقول فوجئت بمنكر ونكير جايين قعدوا يسألوا يسألوا يسالوا لغاية ما قولت يااااااااااه ده أنا نفسى أرجع ساعة واحدة بس ، أقول للناس إنكوا لو رمشتوا بعينيكوا ، هتتسألوا عن الرمشة دى !!! بعد كدة بيقول لما ذهبوا عنه جاء واحد قبيح المنظر جدا ، وفى إيده مرزبة و ظل يجرى وراه فى كل إتجاه و هو يجرى حتى استيقظ على الهرب ، و قاعد يدفع هذا الرجل .

المقصد يا جماعة إحنا بنقول الكلام ده كله ليه ؟ يعنى رمشة العين دى ممكن نتحاسب عليها ؟! أنا بقول الكلام ده لأخواتنا إن رمشة عينيكى ممكن تتحاسبى عليها ، إن اقل حركة وسكنة فى حياتك ممكن تتحاسبى عليها
مستنية إيه ؟! مستنية موت ألفجأة ؟! مستنية إن القبر يضم عليكى ؟! مستنية إنك إنتى تلاقى نفسك فى لحظة البعث ؟! مستنية إنك إنتى تعرضى على الله سبحانه وتعالى ؟ مستنين إيه ؟

ده المرة اللى فاتت و إحنا بنتكلم على تقدر تقول لأ لشهواتك ونزواتك ؟ تقدر تبقى بطل ؟ تقدر تبقى جبل ؟ عايزين نقولك السؤال ده الليلة تقدرى تقولى لأ لشهواتك ؟ تقدرى تبقى بطلة ؟ بصراحة كدة ومن الآخر عايزين نكلم الأخوات فى الحجاب الشرعى السليم ، عايزين نكلمهم فى هذا الموضوع بس قبل ما نكلم فى شرط : إنك إنتى تفتحى قلبك معايا ، و تعيشى فى كل كلمة إنا بقولها


يتبع بإذن الله ...

[طائر السنونو]

خايف عليك ... قلبى بيتقطع عليك

فعايزين نكلم الأخوات يا جماعة ونقولهم إنتوا مستنين إيه ؟! أنا والله يا جماعة ما جاى أجرح فى حد الليلة ، و لا جاى أنتقد فيكى يا أختى ، و لا جاى إن أنا أقولك كلام صعب عليكى ، بالعكس ده أنا أخوكى ، إحنا كلنا إخواتك ، و كل واحدة ماشية فى الشارع مش بس فى المسجد أختى بحق و حقيقى ، خايف عليكى ... أقسم بربى

"لا يؤمن احدكم حتى يحب لأخيه ما يحب لنفسه" رواه البخارى أنا بحب لنفسى الجنة فبحبلك إنتى كمان الجنة عشان كدة أنا بكلمك ، و أنا لو شديت عليكى إعرفى إن أنا لو شوفت أختى يا جماعة هتوقع نفسها فى حفرة فيها نار و بقولها حاسبى و مصممة إنها توقع نفسها فى حفرة فيها نار هعمل إيه ؟
هشدها فى الآخر ، فلو شديت عليكى لإن أنا بشد على أختى ، يعنى الواحد قلبه بيحترق والله

حال النساء دلوقتى وصل لإيه !!!

بقى عادى إن بنت تركب مع ولد فى عربية ده !!! مين ده ؟! إنت مالك إنت ؟! عادى إن بنت تتمشى مع ولد !!! عادى إن يتصل بيها أصحابها فى البيت !!! بل على القهاوى الوقتى عادى إنك تلاقى بنت قاعدة فى بعض القهاوى الراقية !!! البنت ممكن تعض فى القهوة بس القهوة الراقية بس !!! و ممكن تشرب شيشة بس فى القهوة الراقية بس !!!

فبلاد زى القاهرة وإسكندرية تلاقى البنات ماشين بيدخنوا فى الشوارع عادى !!! كل ده عادى ؟!! تقولك إيه يعنى ؟! إيه يعنى إن أنا أصاحب أكلم زمايلى ؟! إيه يعنى إن أنا أصاحبهم أصلا ؟! إيه يعنى إن أنا أتصل بيهم أو يتصلوا بيا ؟! إيه يعنى إن أنا أرنلهم وهو يدينى مسد ؟! إيه يعنى ده يكلمها وده يقف معاها وده يبصلها وده يضحك معاها وده يتمشى معاها !!! عادى كل ده ؟!

وتلاقى نفسك بتُستنكر والشباب يا عينى غلبان ، الشباب يمشى فى الشارع بنات متبرجات ، التليفزيون بنات متبرجات ، الجامعة بنات متبرجات ، المصالح والشركات بنات متبرجات ، و تيجى تكلم والدتها تقولك دى كتكوتة يا أخى! دى لسة كتكوتة صغيرة ! يا أختى أنا مش هرد ! بس أنا هسألك إنتى بالله عليكى إنتى شايفة نفسك كتكوتة ؟! يعنى إنتى بصى لنفسك كدة ؟! إنتى كدة !!!

فعلا يا جماعة ممكن فى هذا الموقف تقولك الحمد لله ، الحمد لله ، الحمد لله ليه ؟ الحمد لله على البنطلون اللى سترنى و التونيك اللى مغطينى !!! و الله مسجد السلاب ده مبيجيش فيه غير ناس معتدلة جدا ، بس عيبه حاجة واحدة بس إن المراوح بتاعته لو زادت شوية ! لحسن الحر على آخر الدرس بيسيح المكياج كله فبنخرج الميك آب بايظ من المسجد !


يتبع بإذن الله ...

[طائر السنونو]

هو ده الحجاب اللى ربك أمرك بيه ؟!

يا جماعة إحنا عايزين نتكلم هو ده الحجاب ؟! ده الحجاب اللى ربنا أمرنا بيه ؟! يعنى إنتى لبستى ايشارب ؟ طب والمكياج ؟ طب والقصة ؟ طب والروج ؟ و كريم الأساس و الكحل و الآي لاينر و الآى شادو ؟!!! إنا لازم أتكلم بصراحة لإن الوقتى إذا كانت واحدة مستحتش إنها تتكلم عن فعل معين ، أنا استحى إن إنا أتكلم عليه ، والمونكير و الكعب ال11 سم و البنطلون الضيق و البلوزة الضيقة كل ده فين ؟!

والإختلاط و الضحك وكلام ده وكلام ده ! كل ده يتسمى حجاب ؟!!! تلاقى واحدة ماشية فى الشارع دى محجبة ؟! دى لابسة إيه ؟! بنطلون ضيق و بلوزة مفصلة جسمها و قصة باينة من تحت الإيشارب المثقوب المخرم ! و مسمينه إيشارب ! إنتى إيه ده ؟! أنا محجبة الحمد لله ! و التانية لابسة تونيك و لافة إيشارب صغير حاولين راسها مدخلاه من جوه البلوزة ، والا التونيك اللى لبساه و جزء من صدرها باين و كعب 11 سم و برفان عاصف ومكياج عاصف !!! إيه ده يا بنتى ؟ ده أنا محجبة و الحمد لله ! هو ده الحجاب ؟ الفضائيات ضحكوا علينا و لا إيه يا جماعة ؟! بتوع الفضائيات ضحكوا علينا ! لوثوا مخخنا ! الوقتى الفضائيات تفتتح بإيه ؟! كليبات ! كليبات ممولها اليهود ! عشان يفتنوا بنات المسلمين ! البسوا زى البنات دول عشان تثيروا شهوات الشباب زى ما دول أثاروا شهوات الشباب ! هو احنا كدة فى المجتمع بتاعنا مستوى الإنحراف بتاع اللى بيجى فى الكليبات؟! لا ، و لكن ده تمويل أجنبى عشان إحنا نتهدم ! عشان دينا يتهدم !

اتقى الله يا شيخ الفضــائيات

بعد كدة الدين ! بعد كدة ربنا ! يجبولنا عم الشيخ ! يا عم الشيخ اتقى ربنا ! يا عم الشيخ هو الصحابيات لما كانوا بيتخطبوا للصحابة ، كانوا بيخرجوا مع بعض ؟! لا ، طب كانت الصحابية بتروح تسأل الرسول صلى الله عليه وسلم و حاطة مكياج خفيف ؟! لا ، طب كانت الصحابية بتروح المسجد و حاطة برفان ؟ لا طيب هو أم سليم و أم سلمى و نسيبة بنت كعب ، الناس دى كلها كانت بتمشى فى الشارع بتونيك و بنطلون و إيشارب ؟ لا ، إمال جبنا الفتاوى منين دى يا عم الشيخ ؟! نتقى الله و إحنا بنكلم الناس فى دينها ، نتقى الله وإحنا بندل الناس على ربنا سبحانه وتعالى


يتبع بإذن الله ...

[طائر السنونو]

ده ســن الإحــتجاب

دلوقتى أنا عايز أكلم المتبرجات ، أكلم مين ؟ أكلم المحجبة حجاب أمريكانى ! و الا أكلم المحجبة حجاب موديل 2005 ! و الا أكلم اللى كاشفة شعرها أصلا ! والا أكلم اللى لابسة لبس إلى حد ما ولكن لسة خطوات على الحجاب الشرعى السليم ! أكلم مين والا أكلم بنات ثانوى !

بنات ثانوى اللى بقوا جرح فى قلب الأمة ، الوقتى البنت بتاعت ثانوى دى الرسول عليه والصلاة والسلام سماها إيه ؟ سماهم "ذوات الخدور " يعنى البنات لما بيوصلوا السن ده بيعدوا فى بيتهم عشان عيب إنهم يتكشفوا على رجالة ، خلاص البنت هتتجوز ، ذوات الخدور

الفلاحين يقولوا البنت استخبت ، يعنى إيه ؟ البنت استخبت يعنى وصلت للسن اللى تعد فيه فى بيتها على ما يجيلها العدل بتاعها ، فالوقتى طبعا البنت اللى بتوصل ثانوى خدى يا بنتى هاتى بنطلون جينز ! استرتش ! خدى يا بنتى اعملى شاعرك عند الكوافير! و خدى يا بنتى هاتيلك مكياج وإنزلى يا بنتى ! باب جديد من أبواب جهنم مفتوح على الشباب فى الشارع البنت طلعت ! إيه ده يا جماعة إحنا اتقلبنا من الحال ده للحال ده

نهــاية بنت غـير محـجبة

دى لسة كتكوتة ! دى لسة صغيرة ! صغيرة إيه يا جماعة !!! حد ضامن عمره ؟! أعرف بنت و كانت من أجمل بنات الجامعة ، وكان كل أنظار الشباب حوليها ، و مرة من ذات المرات وهى قاعدة تكلم الشاب ...فجأة جالها مغص ، المغص بدأ يزيد ، بدأ يشد ، بدأ يبقى معاه ترجيع ، جريت على الدكتور ، فيه إيه ؟ بيكشف لقى ده زايدة لازم يتفتح بطنها حالا ! دخلت أوضة العمليات ، خرج الدكتور بعدها يقولهم يا جماعة ده للأسف مطلعتش زايدة ، ده طلع ورم خبيث أو ورم لعله خبيث أو مش خبيث ، أما اتحلل بعد كدة طلع إنه ورم خبيث شديد الخبث الجمال بدأ يزبل ، و يبدأ أصحابها يبعدوا عنها ، و بقت لوحدها ، و يبدأ المرض ياكل من جمالها وياكل من نضارتها لغاية ما بدأت تحتاج دم ، ووصلوا لدرجة إنهم مش لاقين دم !

علقوا فى الكلية بتاعتها إن فلانة الفلانية صحبتكم عايزة حد يتبرع بدم ، محدش راح اتبرعلها بدم ، و بعد كدة إنتهى الأمر بعد اللف فى مصر كلها وبعد رحلة الألم و بعد رحلة السرطان وماتت و نفذت القضية ، ومن فترة شوفت الشاب اللى كان ، شوفته راكب عربية وماشى و مشغل أغانى على أعلى صوت !!! و ماشى بيرقص جوة العربية !!! سبحان ربى ، إيه ده ؟ حد يضمن عمره !


يتبع بإذن الله ...
http://img541.imageshack.us/img541/3949/42099787.gif

[طائر السنونو]

عارفة بتاخدى كم سيئة من عدم حجابك ؟!!!

إنتى مستنية إيه ! مستنية إيه ! مستنية إن موت الفجأة يجى يخدك ؟! مستنية إيه عشان تطيعى أمر ربنا سبحانه وتعالى يا جماعة أنا خايف إن واحدة تيجى فى رقبتنا يوم القيامة تقول :"إنتوا مكلمتونيش ليه ؟" "إنتوا محذرتونيش ليه؟" أختك تجيلك تقولك :"إنت محذرتنيش ليه؟" "إنتى مكلمتنيش ليه ؟"

إنتى عارفة السيئات اللى إنتى بتخديها و إنتى خارجة متبرجة ؟! عارفة السيئات بتبقى أد إيه ؟ تخيلى إنك إنتى بس مشيتى فى شارع لو بصلك 100 بس ب 100 بصة بس يعنى كل واحد بص بصة 100 سيئة !

طب تخيلى لو نزلتى الجامعة يا أختى ، الجامعة طبعا الشباب اللى فيها بصة إيه ، لو من الألوف دول ألف بس بصولك كل واحد هيبص كام بصة من الشباب 150 كدة 200 ، آدى 150 ألف بصايا خدتيها ! 150 ألف سيئة

ده غير لو واقفتى مع شلة خمسة ستة وقفتيلك ساعتين كل واحد على مدى الساعتين بصلك ! لو عديتى النظرات دى تبقى ألف بصة ، يعنى حوالى 5 تلاف بصة

ده غير لو ربنا رزقك بشاب عنيه هيئة إرصاد ! جابتيك من فوقك لتحتك ربع ساعة ! شوفى إنتى خدتى أد إيه تخيلى يا أختى إنتى واخدة أد إيه ! إنتى عارفة إنتى راجعة بيتك بإيه ؟! لو نزلتى بالليل بس تتمشى و تتفسحى طبعا ألوف الشباب اللى برة بتوع بالليل كل واحد هيبصلك مش هنقول 20 بصة 10 بصات ! هترجعيلك بحوالى 10 ألاف سيئة !!!

كل دى سيئات ! دى و لا حاجة ! ده إنتى لسة قبل كل ده وقفتى ساعتين قدام المرايا ! ساعتين تعدلى الأوصة تحت الطرحة ، و ساعتين تحطى البرفان و ساعتين تعدلى المكياج بتاعك و محدد شفايف قبل الروج ، و الكلام اللى إنتوا بتعدوا تعملوه ! وكل ده متسجل عليكى عشان تبقى جريمة مع سابق الإرصاد والترصد

عارفة بسببك حصل إيه ؟!!

و بعد كدة تخرجى الشارع ، واحدة بنت فى إعداد ى شفيتك قالت :"إنا هطلع زيك" مادام إنتى ماشية كله بيبصلك كدة ، فى ميزانك شاب ملتزم جديد شافك إنتكس ! تلاقى فى ميزانك 50 شاب إنتكسوا ليه ؟ بسببك ، و 50 بنت خلعوا الحجاب ، أو مشوا عريانين ليه ؟ بسببك ، و تلاقى شلة بصت عليكى و إنتى ماشية كدة واحد منهم لما شافك شهوته ثارت راح عمل عادة سرية فى ميزانك !

واحد منهم لما شافك راح زنا فى ميزانك ! واحد منهم لما شافك راح إتجوز عرفى فى ميزانك ! واحد منهم لما شافك نفسه اتفتحت قعد يبص طول الليل عاللى رايحة واللى جاية فى ميزانك ! واحدة لما شافتك وهى لابسة حجاب جديد فتنت بنظر الناس ليكى خلعت الحجاب بتاعها فى ميزانك ! بنتك الصغيرة لما تكبر إن شاء الله تشوف صورك وإنتى شابة صغيرة ، و تقولك إنتى كنتى كدة يا ماما أنا هطلع زيك أنا كمان فى ميزانك !

شارون لو بص عليكى و شاف بنات المسلمين بالمنظر ده ، و فرح وقلبه ينشرح ! يبقى إنتى شمتى أعداء الإسلام فى الإسلام فى ميزانك
شاب ملتزم جديد ولسة خارج من الجامع بص عليكى خشوع الصلاة كله راح فى ميزانك ! كل ده فى ميزانك كل السيئات دى ميزانك !!! الساعتين اللى وقفتى فيهم قدام المرايا و أثمر كل ده ! كل ده على بعضه يجيلوا إيه مليون سيئة !!! و الله يا جماعة بيتهيئلى أكتر من مليون سيئة فى اليوم !!!

طب ده إنتى بقالك 5 سنين بالمنظر ده ! خمس سنين يعنى حوالى كام ؟ ألفين يوم ، ألفين يوم كل يوم بحوالى مليون سيئة !!! ده إحنا فى مليارات الوقتى مش فى ملايين !!! و لسة هتفضلى على المنظر ده أد إيه ؟! وكل يوم عداد مفتوح و عداد شغال ليه ؟ لإنها سيئات جارية !
البنت بتاعت إعدادى اللى لبست زيك اقتداء بيكى دى لآخر عمرها فى ميزانك ! إلا أن توبتى إلى الله توبة نصوحة

يتبع بإذن الله ...

[طائر السنونو]

و الحــل إيه ؟

الوقتى هل إنتى حاسة بإكتئاب ؟ هل إنتى حاسة بضيق ؟ كنت فى المستشفى من كذا يوم ، و معايا واحد زميلى يعنى فلاقيته زعلان ، مش عارف ياكل مضايق ، فى إيه يابنى ؟ أنا مكتئب طهقان ، فى إيه يا أخى ؟
أصل أنا لسة خاطب من أيام و خطيبتى مضايقانى وتعبانى و و زعلنا مع بعض ، قولتلوا يا أخى زعلتوا مع بعض ليه ؟؟ قالى حاجة بسيطة حاجة متذكرش أصلا

قولتلوا يا أخى 30 سنة مصلناش الفجر فى الجامع غير 20 تلاتين مرة فيهم ، و تلاتين سنة بصينا 100 ألف بصة حرام و سمعنا 10 تلاف أغنية حرام ! و بينهم سنتين تلاتة مبنصليش أصلا مكتأبناش و لاجالنا ضيق ؟! و أول ما بنت قالتلنا كلمة صغيرة الضيق و الإكتئاب ركبنا !!! سبحان ربى ...قالى يا أخى : إنت هتجبلى إكتئاب أكتر ما أنا مكتئب ليه ؟ قولت فى نفسى سبحانك يارب ...ده إحنا مش بس مش عايزين نتعب عشانك ! ده إحنا مش عايزين نزعل إن إحنا مبنتعبش عشانك ! ده إحنا مش عايزين نحس إن إحنا مقصرين فى حقك !

تعرفى الرسول صلى الله عليه وسلم وصفك بإيه ؟

إنتى زعلانة الوقتى والا مش زعلانة ؟! زعلانة ولا لأ ؟! يا جماعة التبرج ده أنا مش عايز أقول إنه معصية ! التبرج ده جريمة ، الإفساد اللى إنتى عملتيه للشباب و البنات ! و خدى بالك لو إنتى بإيشارب بس عاملة كل اللى إنتى عاملاه فى نفسك مش هتبقى اللى يبصلك بنص سيئة ! إنما كاشفة شعرك بسيئة زيك زيها مادام بقيتى فتنة ، ما دام فتنتى الشباب زيك زيها !

طب حكم رسول الله صلى الله عليه وسلم فيكى إيه ؟ بصوا الكلام ده بالذات ، مش كلامى أنا عايز أقولك حكم رسول الله صلى الله عليه وسلم فى المتبرجة إيه ؟!!! و إنتى قيسى على نفسك
الرسول صلى الله عليه وسلم يصف المتبرجة:
1. بأنها من أهل النار ، و أنها لا تقرب الجنة بل لا تجد ريحها
2. بأنها ملعونة مطرودة من رحمة الله
3. بأنها زانية ولايقبل منها صلاة
4. بأنها منافقة و أنها من شر هذه الأمة
5. بأنها من صاحبات الكبائر التى تعادل الزنا والسرقة و القتل
6. بأنها من جنود الشيطان

عمرك شوفتى ذنب الرسول صلى الله عليه وسلمبيعظم قدره لهذه الدرجة ؟! عمرك شوفتيها ؟! يبقى إعرفى الذنب ده خطورته أد إيه ؟ الكلام ده أنت جيبتوا منين ؟! جيبتوا من رسول الله صلى الله عليه وسلم ، قال رسول الله صلى الله عليه و سلم "صنفان من أهل النار لم أرهما ، قوم معهم سياط كأذناب البقر يضربون بها الناس،ونساء كاسيات عاريات مميلات مائلات ، رؤوسهن كأسنمة البخت المائلة ، لا يدخلن الجنة ولا يجدن ريحها ، وإن ريحها لتوجد من مسيرة كذا وكذا" رواه مسلم

ده الرسول صلى الله عليه وسلماللى قال كدة ، و الرسول حطك صلى الله عليه وسلممع الظلمة اللى بيضربوا الناس بالكرابيج ، ليه ؟ لأن الأتنين إجرام ، والإتنين هدم فى الأمة ، ما هما زمان لما حاربوا الأمة بالمدافع والقنابل رجعوا قالوا : الناس دى مينفعش معاها الكلام ده ، الناس دى عايزة كأس ...غانية ! طب الغانية دى هنجيبها منين ؟ مينفعش نستورد غوانى ! يبقى الحل إن إنتى اللى تبقى غانية !


يتبع بإذن الله ...

[طائر السنونو]

ترضى تبقى سكين يطعن الدين ؟!

طب العفيفة الطاهرة حفيدة عائشة وخديجة تبقى غانية إزاى ؟ بسيطة أول مرة نعد نكلمها و التعليم والعلم و كشف الوش ، و نكشفلها وش فلانة الفلانية فى ثورة سنة كذا ، و بعد كدة كشف الوش يبقى عادى ! بعد كدة ننزلها مجلات الأزياء تبقى أزياء طويلة و بعد كدة تفضل تقصر تقصر تقصر ! و بعد كدة تبدأ تظهر مجلات فاضحة هذا فستان يكشف مفاتن الظهر ، و هذا فستان يكشف مفاتن مش عارف إيه !

يا جماعة على سنة 1940 كان المجتمع المصرى نسائه منهارة ! أشد من التبرج الموجود الوقتى ، و نفعت المرأة المسلمة إنها تبقى الغانية اللى يهدم بيها الدين ! ترضى إنك تبقى قنبلة تنفجر فى كبد الدين ؟!! ترضى إنك تبقى سكينة يطعن بيها قلب الدين ؟! أديكى رضيتى ! و أديكى وافقتى ! وأديكى سكتى !

ترضى تكونى ملعونة ...ترضى تطردى من رحمة ربنا ؟

بعد كدة يا جماعة قال رسول الله صلى الله عليه وسلم "يكون في آخر أمتي رجال يركبون على سروج كأشباه الرحال ، ينزلون على أبواب المساجد ، نساؤهم كاسيات عاريات ، على رؤوسهن كأسنمة البخت العجاف ، العنوهن فإنهن ملعونات" حسن الرسول صلى الله عليه وسلم بيتنبأ بالسيارات اللى بيركبها الرجال "ينزلون على أبواب المساجد" تلاقى العربيات واقفة على باب المساجد ، والراجل نازل يصلى فى المسجد و بنته ومراته فى البيت شكلهم إيه ! "نساؤهم كاسيات عاريات ، على رؤوسهن كأسنمة البخت العجاف ، العنوهن فإنهن ملعونات" العنوهن فإنهن ملعونات ! ترضى إن الرسول صلى الله عليه وسلم يقول عليكى كدة ، دى اللعنة دى طرد من رحمة الله تطردى من رحمة الله سبحانه وتعالى

المتبرجة زانــية طب إزاى ؟ !!

قال رسول الله صلى الله عليه وسلم :"أيما امرأة استعطرت ، فمرت على قوم ليجدوا ريحها فهي زانية ، وكل عين زانية" صححه الألبانى البرفان ده تبرج ، و المكياج تبرج ، و الأوصة تبرج ، أى حاجة بتظهر زينة المرأة تبرج ، والإختلاط تبرج

"قوم ليجدوا ريحها فهي زانية" و قال رسول الله صلى الله عليه وسلم "لا يقبل الله من امرأة صلاة خرجت إلى المسجد وريحها تعصف حتى ترجع فتغتسل" ..."وريحها تعصف" يعنى البرفان بتاعها ، برفان عاصف ، برفان صارخ

الرسول صلى الله عليه وسلم سمى المتبرجة منافقـة !!!

قال رسول الله صلى الله عليه وسلم : "شر نسائكم المتبرجات المتخيلات ، و هن المنافقات لا يدخل الجنة منهن إلا مثل الغراب الأعصم" صحيح

يتبع بإذن الله ...

[طائر السنونو]

التبرج من الكــبائر

لما أميمة بنت رقيقة جت تبايع النبى صلى الله عليه وسلم بايعها على إيه ؟ قال لها :"أبايعك على أن لا تشركي بالله شيئا "مافيش كفر "ولا تسرقي ، ولا تزني ، ولا تقتلي ولدك ، ولا تأتي ببهتان تفترينه بين يديك ورجليك ، ولا تنوحي" اسمع و إسمعى يا أختى "ولا تتبرجي تبرج الجاهلية الأولى" حسن مافيش تبرج يعنى عشان بس نحط إيديك فى إيد الإسلام كدة تبقى على عهد مع دين ربنا مافيش تبرج ده رقم واحد فى الدين ، و حط عدم التبرج مع عدم السرقة و عدم الزنا وعدم القتل ...الكبائر يا جماعة ...كل ده كبائر

ده مش حجاب أبدا

تخيل الرسول صلى الله عليه وسلم لما شاف واحد بيصلى ، فالصلاة بتاعته سريعة وحشة قالوا "ارجع فصلى فإنك لم تصل" صححه الألبانى لو رسول الله شافك الوقتى أول حاجة مش هايبيعك مش هيرضى يبايعك ، تانى حاجة ارجعى فتحجبى فإنكى لم تتحجبى !

حتة الإيشارب ده مش حجاب فإنكى لم تتحجبى ، زى الراجل اللى بيصلى بس ناقص ، أهوا ده حجاب بس حجاب نار ! يعنى يا جماعة الكلام ده لمين ؟ اللى ماشية خارجة من عند الكوافير ... اللى ضاربة شعرها فى الخلاط قبل ما تخرج متبرجة ، و اللى كاشفة شعرها و عاملاه مش عارف إيه على ، و لابسة بادى واسترتش و كعب متبرجة ، و اللى لابسة إيشارب بس لابسة جيبة بيبان نص رجليها لو قعدت و لابسة كعب معرفش 9 سم و لا 11 سم و برفان عاصف ومكياج عاصف كل ده تبقى برضه متبرجة

عداد سيئاتك شغااااال ...احذرى !!!

إنتوا عارفين التبرج ده يا جماعة كام عداد شغال فيه ؟!!! إنتى عارفة كام عداد سيئات شغال و إنتى ماشية ؟!!! عداد النظر الحرام ليكى آدى واحد ! الواقفة أدام المرايا آدى اتنين ! عداد المكياج آدى تلاتة ! عداد البرفان أربعة ! عداد النمص : قال رسول الله صلى الله عليه وسلم "لعن الله النامصة و المتنمصة" صحيح خامسة ! عداد إفساد الشباب ، و إفساد البنات الصغيرين آدى ستة ، ست عداد ات على الأقل شغالة سيئات وإنتى ماشية !!!

عايزين نقول دلوقتى للأخوات مستنية إيه ؟! مستنية عقوبة ربنا فى الدنيا ، و الا مستنية عقوبة ربنا فى النار ، والا مستنية عذاب القبر ؟! و الا مستنية أهوال القيامة ؟!




يتبع بإذن الله ...

[طائر السنونو]

مستنية عقوبة الدنيا ؟

يا أختى فى الله إنى لكى ناصح أمين و الله العظيم ، إن العبد ليحرم الرزق بالذنب يصيبه ، و تحرمى رزق إيه ؟ إنتى عصيتى ربنا عشان تتجوزى الجزاء يبقى من جنس العمل يتأخر الزواج ! بل الوقتى المكياج قاعد يزيد والجواز يقل وكل ما المكياج يزيد الجواز يقل ، البنات تقول إيه ده ؟! ده لابد إن السبب إننا مش متمجيجين ، نزود المكياج يزودوا المكياج الجواز يقل !

طب ليه ؟! هو ده سنة ربنا دى عقوبة ربنا سبحانه وتعالى ، جزاء من جنس العمل ، إحنا شايفين اللى ربنا عامله فى أمريكا تلت ولايات بالهوا ! هوا اعصار ! تلات ولايات بتتكسر و تتدمر بالهوا بس ...سبحان ربى !!! ومليارات خساير عشان ربنا سلط عليهم الهوا بس

إنتى مش خايفة إنتقام ربنا ؟

مش خايفة إنتقام ربنا فى القبر ؟! لما هتنزلى القبر تتخيلى إنك هتلاقى إيه فى القبر ؟ أول حاجة إنتى هتنزلى القبر بتاعك و إنتى محجبة حجاب شرعى كامل ! لايوجد له مثيل ! خمس أو ست لفات قماش ملفوف عليكى ، نقاب حتى مش خمار ، نقاب كامل ، مافيش برفان إلا لو حاطولك كافور، مافيش مكياج ، مافيش أى حاجة خالص !

اللى كان بيحبك فى الدنيا ، واللى كان بيبصلك فى الدنيا مش هيقف على القبر بتاعك ربع ساعة ! حتى ربع ساعة و الله ما هيقفها !


يتبع بإذن الله ...

[طائر السنونو]

و بعد ما بتنزلى فى القبر !

لما الواحدة بتنزل فى القبر يا جماعة شعرها اللى كانت بتتعاجب بيه بيقع ! حواجبها و رموشها بتقع ! عينيها اللى كانت بتسبلها و تكحلها بتتنفخ وبتنفجر و تسيل على خدودها ! مفاتن جسمها اللى كانت بتبرزها من تحت الهدوم الدود بيعد يآكل فيها شهور ! واجبة غذائية متكاملة العناصر للدود !!!

كل ملمح من الملامح اللى إنتى تزينتى بيها ضد دين ربنا سبحانه وتعالى كلها هتبقى فى القبر شكلها إيه ؟!! و اللى كان بيبصلك فى الدنيا لو بص عليكى فى القبر هيقول إيه ده هيترعب من المنظر والله يا جماعة

مطرودة من رحمة ربنا ! الرسول صلى الله عليه وسلم قال : "العنوهن"يعنى مطرودة من رحمة ربنا ، يعنى يوم القيامة فى وسط العطش و إنتى هتموتى من العطش عايزة مية من إيد النبى صلى الله عليه وسلم ممنوع ليه ؟! أصل دى رحمة وإنتى مطرودة من الرحمة ، هتموتى من الحر عايزة وقفة فى ظل عرش الله ممنوع ليه ؟؟ أصل دى رحمة وإنتى مطرودة من الرحمة

ده إنتى هتدخلى تعرضى على ربنا إزاى ؟ تتميزى فى أرض المحشر !!! "يُعْرَفُ الْمُجْرِمُونَ بِسِيمَاهُمْ فَيُؤْخَذُ بِالنَّوَاصِي وَالْأَقْدَامِ" الرحمان:41
هتدخلى تتعرضى على ربنا كدة إزاى ؟! هتروحى تشربى من إيد النبى صلى الله عليه وسلم من حوض النبى صلى الله عليه وسلم إزاى ؟ هيشوفك هيقولك :"سحقا سحقا لمن بدل بعدى" رواه مسلم

يتبع بإذن الله ...

[طائر السنونو]

إنتى مش حاسة بجهد الرسول صلى الله عليه وسلم ؟!

النبى صلى الله عليه وسلم ضحي بحياته كلها عشان إنتى تطلعى مسلمة ملتزمة ، صبر على الأذى 23 سنة ليل نهار و الصحابة ضحوا بكل حياتهم و مالهم وجهدهم عشان إنتى تطلعى مسلمة ملتزمة و تيجى على الحوض بالمنظر ده ! أحارب اليهود طول حياتى و إنتى تبقى سكينة فى إيد شارون يطعن بيها فى قلب الإسلام ؟! ده أشد من شارون ! ده شارون بيقتل المسلمين بيدخلهم الجنة إنتى بدخليهم النار! ده شارون بيضيعلهم دنيتهم إنتى بتضيعلهم آخرتهم ! ترضى إنك إنتى تقومى بالدور ده ؟! ترضى ؟!!
ولو إنتى مختمرة أو منتقبة يبقى إنتى خنجر فى قلب أعداء الإسلام ، عايزة تبقى سهم فى قلب الإسلام ؟! ولا سهم فى قلب أعداء الإسلام ؟ عايزة تبقى إيه ؟!

هتعدى إزاى من على الصراط ؟!

هتعدى إزاى ؟! اوعى تستهينى ! يا جماعة آدم خرج من الجنة بثمرة ، يا جماعة ابليس طُرد من رحمة الله بسجدة ، يا إخوانا فيه إمرأة حبست فى النار بهرة ، يا أختى فى الله فيه رجل هوى فى النار سبعين خريف بكلمة ! محدش يستهين ، قبرك يا أما روضة من رياض الجنة ، يا أما حفرة من حفر النار !
بتبرجك ده ملك اليمين ولا ملك الشمال اللى بيكتب ؟ و لو ملك الشمال اللى بيكتب يبقى قبرك هيبقى إيه ؟! هتعملى إيه هتستحملى عذاب الله إزاى فى النار ؟! مستنية النار ؟! إنتى مستنية إيه ؟!

يتبع بإذن الله ...

[طائر السنونو]

مستنــــية جــــهنم ؟!

ده حر نار الدنيا اللى هى الشمس ، أكتر حاجة فى نار الدنيا ، الواحد ساعات والله ياجماعة بيبص قدام الفرن وهو مولع يقول يا إلهى لو واحد اتقال له إنت هتدخل تعيش هنا هيجرجر إزاى و هيقاوم إزاى و هيتسحب على وشه إزاى !!! منظر مفزع هتستحملى إزاى ؟!

أنا عايزك بس قبل ما تحطى مكياج تروحى المطبخ ، حطى المرايا فى المطبخ ، بلاش تحطيها فى أوضة النوم حطيها فى المطبخ ، ولعى البوتجاز و حطى إيدك على الشعلة لو استحملتيها حطى مكياج !

إزاى تجرؤى مش إزاى ترضى إن جسمك يبان ؟ إزاى تجرؤى إن جسمك يبان أو مفاتن جسمك تبان و لو من تحت الهدوم ؟

ألم تعلمى أن طعام أهل النار نار ؟ ألم تعلمى أن ثياب أهل النار نار ؟ ألم تعلمى أن فراش أهل النار نار ؟ ألم تعلمى أن شراب أهل النار نار ؟ إنتى مش عارفة إن هى نار ولا إيه ؟ مش عارفة إن هى نار !!!

يا أختى كبرى فى أى حاجة إلا فى مصيرك ، إنما ما تستهتريش بمصيرك و إنتى واقفة بين ايدين ربنا سبحانه وتعالى غير يا جماعة نار الشمس دى نار الدنيا ، الشمس من على بعد 93 مليون ميل ، نار القيامة الشمس من على بعد ميل يعنى فرن نار جهنم 70 مرة قد الشمس بس مش على بعد ميل و العياذ بالله ، والعصاة جواها بيتشوا فيها و العياذ بالله ، مين اللى يستحمل هذا الحر ؟!!


يتبع بإذن الله ...

[طائر السنونو]

إيه هو الأكبر جهنم ولا الجنة ؟ الأكبر الجنة بما لايوصف من المساحة ، جهنم أصغر من الجنة ، طيب عدد أهل الجنة أكتر ولا عدد أهل النار ؟! عدد أهل النار 999 قصاد كل واحد ، غير ملايكة العذاب هنا وملايكة الرحمة هنا ، يعنى عدد أهل النار أكتر بكتير جدا

طب حجم الكافر فى جهنم أكبر ولا حجم المؤمن فى الجنة ؟ المؤمن فى الجنة سبعون ذراع ، إنما الكافر فى جهنم كما صح عن رسول الله صلى الله عليه وسلم ضرسه مثل جبل أحد ، لما الواحد يعد يتعور فى جلده الجلد بيتخن ، يفضل يتخن لغاية ما ضرسه يبقى مثل جبل أحد !
يعنى تخيل النار دى صغر حجمها مع كبر عدد اللى فيها مع عظمة اجساد اللى فيها ! يعنى ده كربسة فوق بعضه ده مش بس حر نار "فَالَّذِينَ كَفَرُوا قُطِّعَتْ لَهُمْ ثِيَابٌ مِّن نَّارٍ" الحج: 19

ده نوع من أنواع العذاب تخافى إن هو يتعمل فيكى والا لأ ؟! طب ما يتعملش فيكى ليه ؟ الجزاء من جنس العمل "قُطِّعَتْ لَهُمْ ثِيَابٌ مِّن نَّارٍ"قصاد ثياب التبرج اللى لبستيها ! "يُصَبُّ مِن فَوْقِ رُؤُوسِهِمُ الْحَمِيمُ" الحج:19 قصاد من فوق رأسك اللى إنتى عملتيه على شعرك "يُصْهَرُ بِهِ مَا فِي بُطُونِهِمْ وَالْجُلُودُ" الحج:20الجلود من برة جسمك اللى بينتيه ، يبقى الداخل والخارج كل ده عذاب فى جهنم

تحبى تكونى من أهـــل النـــار ؟

ده غير إن الرسول صلى الله عليه وسلم قال إيه ؟ "صنفان" من إيه ؟ "من أهل النار" أهل النار يعنى إيه ؟ لما أقولك أهل هذا البيت يعنى مش ساكنين بقالهم يوم دول بقالهم سنين ، عشان يبقوا من أهل هذا البيت يعنى القعدة فى جهنم لذنب التبرج سنين طويلة ، و أهل البيت يعنى اللى عمروا الصالون وعمروا الأنتريه و عمروا الحمام وعمروا المطبخ ، يعنى البيت كله أهل بيهم ، يعنى جميع إنواع العذاب فى جهنم للمتبرجة والعياذ بالله

طب مين اللى يستحمل العذاب ده؟! وليه و إيه اللى يستأهل ؟! و مستنية إيه عشان تفرى من هذا العذاب ؟! مستنية إيه ؟! كل العذاب ده و كل هذا العذاب و كان ليكى قصر فى الجنة ضاع عليكى ، إنتى الوقتى بيت النار بتاعك أهو !

يتبع بإذن الله ...

[طائر السنونو]

كل النعيم ده تضيعيه ؟!!

و بيت الجنة ؟! امرأة عفيفة طاهرة نقية هى اللى ساكنته ، إنتى لو أطعتى ربنا وتعففتى جمالك فى الجنة هيبقى لا يوصف ، لما تقرأى نصوص جمال الحور العين هيجوا دول إيه فى جمالك ؟!! شعرك هيبقى جماله شكله إيه ؟!!
ده النصيف الخمار على الراس كدة خير من الدنيا و ما فيها ما بالك لو الشعر اتكشف عنيكى شدة سواد الننى و شدة بياض العين و شدة وسع العين وشدة جمال ورسمة العين هيبقى شكلها إيه ؟!
ثغرك هيبقى جماله شكله إيه ؟!ده إنتى ريقك لو تفلتى فى البحر يبقى عذب ، زوجك قوته يعنى وحبه ليكى و حنانه عليكى ، كل النعيم ده تضيعيه ليه ؟! فيه يا جماعة نساء قضوا حياتهم كلها ، حياتهم تروح بس حجابهم ميروحش !

ثبات عجيب...وأنتى !!!

امرأة كانت فى سفينة فى البحر وهى جاية إلى مصر ، و السفينة بتغرق و جوزها بيشدها من الأوضة عشان تطلع تجرى ، قالتله لا أجرى أجيب النقاب بتاعى ! قالها هتغرقى ، قالتله :"إلا نقابى أنا أموت و أنا لابسة النقاب بتاعى و ألقى الله بالنقاب أشرف لى عند الله سبحانه وتعالى" و صممت إنها تنزل تجيب النقاب بتعها !

يعنى فى أخوات كتير الواحد يعرفهم يا جماعة بيلبسوا النقاب على السلم من شدة حرب أهاليهم عليهم ، و تصميهم على لبس النقاب بيلبسوه على السلم ! عشان ميقولوش لأهاليهم أو عشان أهاليهم ميحربوهومش

يتبع بإذن الله ...

[طائر السنونو]

قصة توبة شمس البارودى

شمس البارودى كانت إيه ؟! بس لما ضاقت أول مرة لبست الحجاب الشرعى و كانت مسافرة تعمل عمرة ، أول مرة فى حياتها تلبس اللبس الشرعى و هى بتطوف حوالين الكعبة ، بتقول فأخذت دموعى تنهمر أول مرة تجرب الإحساس الرائع ده ، الإحساس المبهر ده

فليقولوا عن حجابى يقولوا اللى هما عايزين يقولوه يتريقوا يسخروا...لا و ربى لن أبالى ، لن أبالى باللى هيقولوه صحباتى ، أو اللى هيقولوه أهلى و الا اللى هيقولوه خطيبى ، و الا اللى نفسى هتوسوس بيه ليا ، لا وربى لن أبالى قد حمانى فيه ربى و حبانى بالجلال ، ملكة المنقبة دى أو المختمرة و الله العظيم ، بتبقى ماشية ملكة ، منظر ملكى ، إيه اللى يحرمك من هذا المنظر الملكى ؟ إيه اللى يحرمك ؟ و تابت إلى الله و بقت إيه ؟! بقت داعية إلى الله سبحانه وتعالى ، ربنا أكرمها هذا الكرم

الحقى اركبى فى قطــار التوبة

فاعيزين نتوب إلى الله عايزين نتوب ، القطر لسة الوقتى فى المحطة ، إحنا واقفين فى محطة التوبة و القطر لسة مهدى وواقف شوية والقطر هيروح و لو راح القطر خلاص مش هنلحقه تانى !!! فرعون ماتبش و لما القطر عدى و جه يتوب ويقول "آمَنتُ أَنَّهُ لا إِلِـهَ إِلاَّ الَّذِي آمَنَتْ بِهِ بَنُو إِسْرَائِيلَ" يونس:90 جبريل بيقول لسيدنا محمد عليه الصلاة والسلام فلو رأيتنى يا محمد و أنا أضع الطين فى فمه مخافة أن تدركه الرحمة ، ليه ؟ خلاص القطر فات عليه عايز يركب بعد ما القطر فات ، ماعدش ينفع ! فإلحقى اركبى فى قطر التوبة قبل أن ينفذ هذا القطار


يتبع بإذن الله ...

[طائر السنونو]

عفاف الصحابيات

ده إحدى الصحابيات أم سلمى بتقول للرسول : يا رسول الله الإزار بتاع الرجالة لغاية الكعبين ، طب إحنا نعمل إيه ؟! قالها : "يرخين شبرا" صححه الألبانى طولى شبر شوية ، يعنى تبقى العباية دى كدة هتوصل للأرض ، قالتله :" إذاً تنكشف أقدامهن" دى خايفة إن مشط رجليها يبان ! شايفين العفاف يا جماعة

فاكرة المرأة اللى كان عندها صرع ، اللى راحت للرسول قالت له :"يارسول الله ...فادعوا الله لى" قالها :" إن شئت صبرت ولك الجنة " رواه البخارى اصبر آه الجنة ، بس يا رسول الله أنا بتكشف يا رسول الله ، أنا بتكشف لما بتجيلى نوبة الصرع ، صبرت على الصرع و لم تصبر على التكشف ، صبرت على مرض التشنجات وعض اللسان و نزف الدم من اللسان ! و مصبرتش على إن جزء من جسمها يبان ! و هى مريضة معذورة مش بمزاجها ! يبقى إحنا هنعمل إيه ؟! و إحنا هنروح فين !!!

السيدة عائشة بتقول : "رحم الله نساء الأنصار ، لما نزلت "يَا أَيُّهَا النَّبِيُّ قُلْ لأَزْوَاجِك" شققن مروطهن، فاعتجرن بها " مستنوش يروحوا تانى يوم ينأوا طرح ...لالالا ...كل واحدة طلعت ثوب من أثوابها شقيته نصين فأختمرن به فى ثانية ، لا واحدة قالت استنى لما ليلة العمر أعيشها على مزاجى ، و الا واحدة قالت استنى لما اتمتع بجمالى شوية ، و الا واحدة قالت عشان ألبس أجمل فستان فى أجمل ليلة فى عمرى

و الا واحدة قالت لا المكياج ، و مش هيجيلى عريس مناسب لو محطتش مكياج ، و الا واحدة قالت جوزى مش راضى و الا خطيبى مش راضى و لا فكروا فى الكلام ده خالص !

على طول قال الله ، سمعنا وأطعنا فورا ، فإنتى مستنية إيه ؟! بعد كل ده مستنية إيه ؟! إيه اللى إنتى منتظراه من الله سبحانه وتعالى ؟!


يتبع بإذن الله ...

[طائر السنونو]

لو حد شافك حيعرف إنك مسلمة ؟!

"وَلَا تَبَرَّجْنَ تَبَرُّجَ الْجَاهِلِيَّةِ" الأحزاب:33عارفين يا جماعة تبرج الجاهلية الأولى كان إيه ؟ حد منكم يعرف تبرج الجاهلية الأولى ؟ يعنى كانت المرأة بتلبس الطرحة على راسها ، يبدو حتة كدة فى مقدمة راسها وعنقها ، إنما لا عمرنا سمعنا إن مرات أبو جهل لبست بادى و الا مرات أبو لهب لبست اسريتش ! و لا والله كانوا يرضوا يلبسوه و الله اللبس اللى بتلبسه المسلمة دى الوقتى والله ما يرضوا يلبسوه !
المسلمة الوقتى مبتتعرفش من غير المسلمة فى الشارع من كتر اللبس اللى هى لبساه ، من كتر ما هو لبس بعيد عن دين الإسلام و ملة الإسلام و عن رضا الله سبحانه وتعالى

السيدة عائشة دخل عليها ستات لابسين نقاب بس رقيق شوية قالتلهم : "فليس هذا بلباس المؤمنات" دول ما كانوش لابسين الحجات اللى فوق دى و لا الحجات اللى برة دى ، دول لابسين نقاب ! بتقولهم ده مش لبس المؤمنات المؤمنات تلبس ثياب تقيلة متصفش عن صفات جسمهم من تحت ، هوا ده لبس المؤمنات
إمال لو السيدة عائشة جت دلوقتى و شافت ده هتقول إيه ؟! هتقول ده ثياب إيه ؟!

يا أختى فى الله توبى إلى الله وأول خطوة ده بس ايشارب ؟! ده تبرج الجاهلية يا جماعة ، اللى إنتى هتلبسيه ده الخطوة الأولى بتاعتك ، يعنى متستنيش إن الشيطان يضحك عليكى


يتبع بإذن الله ...

[طائر السنونو]

حجابك عداد حسنات

الحجاب يا جماعة عداد حسنات شغال بلا توقف ، كل واحد كان هيبصلك لو متبرجة و مبصلكيش لإنك محجبة خدتى حسنات ، المليون حسنة اللى إحنا قولناهم ، البنت بتاعت إعدادى إذا شفتك باللبس ده قالت هطلع زيك فى ميزانك ، واحدة تانية متبرجة شافيتك قالت هطلع زيك بيبقى منظر جميل منور كدة فى ميزانك

يا بختك عند ربنا ، يا بختك بقصرك فى الجنة ، يا بختك بقربك من رضا الله سبحانه وتعالى ، يا بختك بعدد الحسنات اللى إنتى خدتيها ده عداد حسنات لا يتوقف ! شغال طول ما إنتى محجبة ، عبادة مستمرة ، عبادة طول ما إنتى ماشية بالحجاب بتاعك طول ما إنتى قاعدة تخدى حسنة ! عكس التانية ، عكس المتبرجة

اوعى الشيطان يضحك عليكى !

يبقى إذاً يا جماعة مش عايزين نستنى ، يا أختى هتستنى أما الشيطان بيجى يقولها و هى لسة بنت كدة إنتى لو محطتيش مكياج مافيش عريس هيجيلك ، ومحدش هيبصلك و هيجيلك عريس أى كلام

طيب جالها عريس و اتخطبت لا حماتك لو شفيتك من غير مكياج على طول هيهرب منك ، و لو شافك من غير مكياج خلاص معدش هيبقى ليكى قيمة عنده !

طب بعد ما تتجوز ده البنات مالية الشارع افضلى حوطى مكياج فى الشارع عشان جوزك يفضل يشوفك جميلة ! "تعس عبد الدينار والدرهم " رواه البخارى تعسة عبدة المكياج ، المكياج هو اللى بيعملى وضع وسط المجتمع ! و المكياج هو اللى هيجبلى عريس حلو ! والمكياج هو اللى هيخلى جوزى يحبنى وميبصش لغيرى ! والمكياج هو اللى هيخلينى بنت ستايل ! يا جماعة ذالكم الله اللى بيجيب عريس و بيجوز و بيسعد ، هو الله سبحانه وتعالى




يتبع بإذن الله ...

[طائر السنونو]

هل يستويــــان ؟

واحدة كحلت عينيها بواحدة غطت عنيها ؟! واحدة كحلت وزوقت شفيفها وخدودها بواحدة غطت شفايفها وخدودها ؟! واحدة وشها طاهر نقى ماء الوضوء هو اللى غسله مافيش أى مكياج عليه بواحدة حاطة مكياج صارخ حطة حوالى 15 و الا 10 أنواع مكياج فى وشها ؟! لو عدناهم هنلاقيهم فوق العشرة ! هل يستويان ؟

"فَأَيُّ الْفَرِيقَيْنِ أَحَقُّ بِالأَمْنِ" الأنعام:81 مين اللى أحق إنها تقول العريس هيجيلى ؟ دى والا دي ؟ أى دفعة من دفعات الجامعة لو جيتوا تشوفوهم بعد سنتين من التخرج تلاقى كل الملتزمات اتجوزوا ، طيب و الأخوات التانين للأسف قاعدين! طب ليه 99% من الحالات بتلاقيها بهذا المنظر ؟!

دلوقتى الشباب عادوا بيخافوا ! اه والله يعنى دى كلمة يا أختى بقولها لك بصراحة ، الشباب بيخافوا ! يعنى كان فى واحد ماشى ورا مجموعة بنات كدة داخل سكشن ، فواحد صاحبهم كان لسة خاطب فلقاهم بيقولوا إيه ؟ هما يفضلوا يكلمونا و يمشوا معانا ويضحكوا معانا ، و أما يجوا يجوزوا يروحوا يشوفوا غيرنا ! بيتكلموا بقهرة وهى دى الحقيقة ، و كان ولد يعنى قبل ما يلتزم بيتكلم مع بنت فى النادى فبتقولوا إنت هتتجوز ؟! قالها أنا لا يمكن أتجوز بنت من النادى قالتله ليه ؟! طبعا اتغاظت ! قالها : بنات النادى - إحنا مش بنشتم فى بنات النادى - أنا بقولك رأى الشباب ! أنا مش بقول رأيي ، أنا بقولك الشباب بيفكروا إزاى ؟! بقولك الشباب بيبصوا إزاى لأم بنطلون

يتبع بإذن الله ...

[طائر السنونو]

تبرجك مش هيغير القدر اللى اتكتب من الآف السنين

اوعى حد يضحك عليكى ، اوعى الشيطان يضحك عليكى ، اوعى الشيطان يلعب بعقلك ، يا أختى فى الله الكحل مش هيغير اسم اتكتب من خمسين ألف سنة ، الآى لاينر والآى شادو مش هيغيروا اسم اتكتب من خمسين ألف سنة ، الروج وكريم الأساس مش هيغيروا اسم اتكتب من خمسين ألف سنة !

مافيش حاجة هتغير قدر الله سبحانه وتعالى ، خليكى مع الله ، خليكى مع ربنا سبحانه وتعالى ، الله قادر ، الله بقدرته نجا إبراهيم من النار ميجبلكيش عريس ؟! الله بقدرته شق البحر لموسى ميجبلكيش عريس ؟!

اقفى قدام المرايا كدة وإنتى بتعدلى الحجاب بتاعك ، و بتعدلى نفسك عشان مافيش حاجة من جسمك تبان ، قولى عشانك يارب أنا عملت كدة ...عشانك يارب ، و من ضحى لله بشئ عوضه الله ما هو خيرا منه

يتبع بإذن الله ...

[طائر السنونو]

انتى عارفة عظمة من تعصيه ؟!

خليكى انسانة تقية لله ، خطيبك والا ربنا ؟! جوزك والا ربنا ؟! أهلك و صحابك والا ربنا ؟ عايزين نفكر تفكير حقيقى يا جماعة ، تفكير نقف بيه بين ايدين ربنا سبحانه وتعالى ، اقفى فى الدور الخامس وبصى على واحدة صحبتك تحت صغيرة ، طب من الدور العاشر صغيرة ، طب اقفى من برج القاهرة زى النملة ، طب من فوق سبع سماوات إنتوا باينين أد إيه ؟! إنتوا إيه من فوق سبع سموات ؟! الله قدرته عليكم شكلها إيه ؟!

أنا عايزك تلبسيه حب لله سبحانه وتعالى فأنا مش عايزك يا أختى تحسى إنى بشد عليكى ، و الله يعلم الله سبحانه وتعالى كل ده خوف عليكى و كل ده شفقة عليكى من عاقبة هذا الذنب العظيم ، بل عاقبة هذه الجريمة العظيمة


يتبع بإذن الله ...

[طائر السنونو]

طب المكياج ؟

البت تقولك إيه يعنى المكياج الخفيف ؟ إزاى يا بنتى ؟! ربنا بيقول "وَالْقَوَاعِدُ مِنَ النِّسَاء اللَّاتِي لَا يَرْجُونَ نِكَاحاً" النور:60 اللى عندها 70 سنة "فَلَيْسَ عَلَيْهِنَّ جُنَاحٌ أَن يَضَعْنَ ثِيَابَهُنَّ غَيْرَ مُتَبَرِّجَاتٍ بِزِينَةٍ وَأَن يَسْتَعْفِفْنَ خَيْرٌ لَّهُنَّ وَاللَّهُ سَمِيعٌ عَلِيمٌ" النور:60 يعنى بشرط ميحطوش زينة ، بشرط إنهم ميتمكيجوش اللى عندها سبعين سنة ربنا حرم عليها المكياج و هيحلهولك إنتى بأى تفكير يا جماعة ؟!

البنات فعلا مستعبدات للمكياج بيتهيئلها إن المكياج ده اللى هيجوزها ! و الله هذا كذب ، وأكتر من تلت تربع أو نص المسجد اللى قاعد قدامى دول لو شاف واحدة - ساعة ما يجى يجوز - فى وشها نقطة مكياج ما هيجوزها !

يا جماعة خلاص يا أختى فى الله ما عدتش هذه نظرة الشباب المتدين ، و اللى مش متدين ربنا معاقبه بذنوبه معهوش فلوس فمبيجوزش

يعنى هيجيلك الشيطان - الحقى قبل ما الشيطان يجيلك ويضيع نور الإيمان اللى دخل قلبك و بدأ صدرك ينشرح للإيمان - هيجى يقولك : خطيبك لو إنتى مخطوبة مش هيوافق ! طب لو خطيبك قالك مش هاجيب أوضة سفرة هتقولى معلش أصله مش هيوافق ؟! هتعملى إيه فى ده ؟! فى جوازات بتبوظ بسبب النيش بتاع الكوبيات ده ، يعنى إنتى اشمعنا اصريتى فى حاجات الدنيا أوى ؟! طب لو إنتى اتقدملك واحد خطبك وقالك إلبسى نقاب هتلبسيه ! يعنى عشان البشر تلبسى وعشان ربنا ماتلبسيش !!!

طب هتقوليلى جوزى ! يا جماعة إنتوا بتلاقوا الأخوات فى بيوتهم مبيحطوش مكياج أصلا ، و أما تيجى تخرج تحط مكياج كامل ! طب جوزك فين بقى ؟! ما هوا لو جوزك هتحطيله فى البيت ، إنما ده إنتى بتحطى وإنتى خارجة برة البيت مش وإنتى جوة البيت



يتبع بإذن الله ...

[طائر السنونو]

إثبتى وشوفى ثبات المسلمات !

الشيطان هيروح لأهلك طبعا - هوا هيسيب أهلك ؟! هوا هيخلى أهلك وصحباتك و كل معارفك و قريباتك ؟! - إنتى هضيعى نفسك يا بنتى ! إنتى هتستشيخى ! إنتى هضيعى جمالك !
اقفى و اصمدى ، اوعى تسيبى اى حد يأثر فى عزمك واقبالك على الله سبحانه وتعالى اوعى حد يخوفك

"يَا مُوسَى أَقْبِلْ وَلَا تَخَفْ " القصص:31 اقبلى - ولا تخافى - على الله سبحانه وتعالى ، شوفى المسلمات ضحوا بإيه ؟! أم سلمى ضحت بجوزها و إبنها عشان ربنا ، و أم سليم ضحت بمهرها و شبكتها و قالت مهرى الإسلام عشان ربنا ، و مين كمان ؟ سمية طعنت من أبى جهل بعد ما عذبها عشان ربنا ، وضحيت بحياتها كلها عشان ربنا
ماشطة امرأة بنت فرعون ضحيت بولادها ، يترموا فى الزيت المغلى قدامها عشان ربنا

يتبع بإذن الله ...

[طائر السنونو]

هم قدموا للشيطان ...إنتى هتقدمى إيه عشان ربنا ؟

أهل الباطل : البت اللى ماشية بإسترتش و بادى ، ألف شاب بيتريأ عليها فى كل نزلة و بتنزل برضه بالمنظر ده ! طب ما تستحملى إنتى عشان ربنا سبحانه وتعالى ، أول واحدة خلعت الحجاب دى خدت تريئة أد إيه ! و خدت شتيمة أد إيه ! و خدت معارضة أد إيه ! أول واحدة لبست استرتش خدت سب من المجتمع كله ومن أهلها أد إيه و استحملت عشان الشيطان و عشان هواها !

إنتى متستحمليش عشان ربنا سبحانه وتعالى و هتستحملى لأجل محدود لغاية ميتقدملك واحد ملتزم طول ما إنتى ملتزمة هيتقدملك الملتزمين يتقدملك واحد ملتزم سعتها فعلا هدوقى الجنة فى الدنيا

إنما تتجوزى شاب تافه ! من يومين شاب البابى بتاعه جابله تيلفون بكاميرا ، فشاف بنت حلوة ماشية مع مامتها فجرى عايز يصورها إذا سمحتى يا عمتو بس سبينى اصور !!! فالست بتزق فيه ، بتزوقينى إزاى ! أنا بعمل إيه أصلا غلط ! فبدأ يزقها و يصور غصبن عنها ! لغاية ما صور الصورة غصبن عنها بقت شاكلة والولاد داخلة فى بعض ! واحد كتفه اتخلع ! شايفة التفاهة ! شايفة السفاهة ! شايفة التدنى إيه ده !

عايزة تتجوزى واحد كدة حطى مكياج ! لو هيا دى النوايا اللى إنتى عيزاها حطى مكياج زى ما إنتى عايزة ! و اعملى وخافى من خطيبك وخافى من جوزك و لكن لا تخافى من الله سبحانه وتعالى !!!

يتبع بإذن الله ...

[طائر السنونو]

طب لو أنا عايزة اشتغل ؟

ده أنا دكتورة اشتغل إزاى و أنا لابسة نقاب ؟ يا جماعة الجراحين والجراحات بيقفوا فى أوضة العملية لابسين نقاب عارفين كدة والا لأ ؟ بيلبسوا البتاع اللى بيغطى لغاية العين ... نقاب !
لاهيا بتقول نفسى اتخنق و اتكتم منه و لا هو بيقول ! محدش بيقول كدة ليه ؟ عشان الضرورة الطبية ، عشان حماية النفس من أخطار الدنيا

طب حماية النفس من أخطار الآخرة ، لقاء الله و إنتى عاصية لله سبحانه وتعالى

يعنى أى شبهة هتقوليها ، أى مانع فى صدرك ، أى حاجة الشيطان هيقولها لك أنا عايزة أتمتع بشبابى و ليلة العمر! ليلة العمر إيه يا بنتى ؟! و عبال ما تتجوزى إيه ؟! البنات كانوا تحت العمارة فى دمياط ، العمارة وقعت فى ثانية !
كان منهم نصهم بيقولوا هنتحجب أما نتجوز ! ملحقوش يتحجبوا قبل ما يتجوزوا ! و الا لحقوا يتجوزوا أصلا !!!

حد يضمن أجله ساعة واحدة بس عشان يقول أما ؟! إنتى بتسوفى فى جريمة ! فى كبيرة من الكبائر و العياذ بالله ! فنسأل الله سبحانه و تعالى أن يعف أخواتنا ، ونسأل الله سبحانه وتعالى أن تنشرح صدور الأخوات لمثل هذا الكلام ، فاوعى تستنى ، و اوعى نفسك تضحك عليكى ، و اوعى الشيطان يضحك عليكى و متستنيش


يتبع بإذن الله ...

[طائر السنونو]

شروط الحجاب الشرعى السليم

1.الإيشارب بتاعك يكون طرحة سابغة تغطى حوالى نص جسمك يغطى النص الفوقانى ، يا جماعة مش شرط لما بقول خمار مش شرط صورة الخمار اللى إحنا بنشوفها ، لو لبستى المواصفات اللى أنا بقولها هتبقى إنتى إن شاء الله محجبة

2. ميبقاش مخرم ومثقوب ! ميبقاش إيشارب صغير وتدخليه من جوة الهدوم ! و جزء من صدرك يبان ! ميبقاش مطرز ميبقاش الوان الطيف !
3. العباية عارفة اسدال الصلاة اللى إنتى بتلبسيه ؟ اهى دى بالظبط ، إنتى واقفة بين ايدين ربنا بإسدال الصلاة وإنتى واقفة بين ايدين ربنا وإنتى فى الشارع نفس اسدال الصلاة

ربنا سبحانه وتعالى بيقول " وَلْيَضْرِبْنَ بِخُمُرِهِنَّ عَلَى جُيُوبِهِنَّ" النور: 31و بيقول "يُدْنِينَ عَلَيْهِنَّ مِن جَلَابِيبِهِنَّ " الأحزاب: 59 جلابيبهن مش تونيك و الا بنطلون و الا بلوزة ، جلابيب جلباب عباية عباية واسعة سابغة ، هو ده اللبس بتاعك

"لا تصف ولا تشف" يعنى إيه ؟ "لا تصف" يعنى مش مبينة و لكن معرفة الناس ملامحك ، يعنى بتبين ملامح جسمك من تحت ، طب يعنى إيه "لا تشف"؟ يعنى بتظهر ، يعنى زى الشيفون كدة مبين اللى تحته والعياذ بالله
كإن المرأة ماشية عارية فى الشارع !

الرسول عليه الصلاة والسلام أهدى الى أسامة ثوب تقيل ، فلما لقى سيدنا أسامة ملبسوش قاله :" مالك لم تلبس القبطية" حسن فقال :" كسوتها امرأتي " ، الرسول قاله :"مرها فلتجعل تحتها غلالة" حسنالثوب الكثيف ده تلبس تحته ثوب تانى ، شوف الرسول قال إيه ؟ شوفى كلمة رسول الله عشان تعرفى شروط الحجاب من لسان رسول الله صلى الله عليه وسلم : "فإني أخاف أن تصف حجم عظامها"حسن أنا خايف تبين حجم عضمها من تحت الهدوم ، يعنى إيه؟ يعنى الجلباب ده العباية دى ميعرفش اللى يبصلك إنتى تخينة و الا رفيعة ؟ شرط يا جماعة

ده الحجاب اللى ميفتنش ، أى حاجة تانية هتفتن اللى بيبصلك ، وغالب الأخوات بتلاقيها كدة فعلا ، متعرفش هى تخينة ولا رفيعة ...ياااه ، حتى الأخ ممكن يتقدم لأخت يحسبها رفيعة جدا ، و يفاجأ بعد الجواز ... بتحصل والله ابقوا خدوا بالكم من الموضوع ده كويس فلا تشف ولا تصف

4. يعنى عشان أكلمك بصراحة من عند الصدر من أعلى ميبقاش واسع ، طب الوسط ؟ مافيش وسط ، مافيش حاجة اسمها وسط للعباية اللى إنتى لبساها ، ووسط دى يبقى إنتى دخلتى فى تفصيل الجسم
والطول بتاعه ؟ طويل بحيث إنك لو قعدتى جزء من رجليك ميبنش ، طب ألوإنه ؟ إلبسى اللون اللى إنتى عايزاه ولكن إياكى و الالوإن اللى هى داخلة فى بعضها و الحاجات الغريبة والكاروهات ! إياكى وهذه الألوإن العجيبة
وحاجات ملفتة تخطف عين أى حد يبصلك

يتبع بإذن الله ...

[طائر السنونو]

مفســدات الحجاب

1. البرفان ، العطر
2. المكياج بكل أنواع المكياج بما فيه المونيكير
3. الكعب العالى

التلت حاجات دول مفسدات للحجاب ، يعنى متبإيش عاملة زى اللى صامت لغاية العصر ! مينفعش لازم تكملى للمغرب ، صلت الضهر ركعتين ! مينفعش لازم أربع ركعات ، حجاب شرعى كامل

درجـــات الحجاب

ياجماعة تلت درجات : فى حجاب المرأة الصالحة ، و فى حجاب المرأة المصلحة ، و فى حجاب المرأة السابقة حجاب المرأة الصالحة : اللى هتلبسى عباية واسعة ، و هتلبسى ايشارب كبير وواسع ميبينش جزء طبعا من مقدمة شعرك ابدا ، و اللى هيشوفك هيقول دى بنت محترمة و بنت ملتزمة ده حجاب الصالحة

حجاب المصلحة : اللى هو النقاب ، أو الخمار اللى حتى لابسة معاه جوانتى ، اللى بيبقى منظر كدة اللى يشوفهم يقول ده الإلتزام إنتشر ، مش يقول إنتى كويسة ...لا يقول ده الإلتزام إنتشر فى المجتمع ، عنوان على الإلتزام بقيتى عنوان على دينك


يتبع بإذن الله ...

[طائر السنونو]

النقاب شرف ليكى

أنا دايما بقول يا خمار يا نقاب ، إنما خدوا بالكوا النقاب ده يعنى زوجات النبى صلى الله عليه وسلم كانوا لابسين إيه ؟ نقاب ، بنات النبى كانوا لابسين إيه ؟ نقاب ، زوجات الصحابة كانوا لابسين إيه ؟ نقاب ، بنات الصحابة كانوا لابسين إيه ؟ نقاب ، النساء المسلمات ألف و400 سنة لغاية ثورة 19 كانوا لابسين إيه ؟ نقاب

يعنى يا جماعة كلمة النقاب دى مش كلمة سهلة ، النقاب ده شرف ليكى ، بس مش المنقبة اللى تلاقيها مغطية بؤها و باقى وشها ، أو تلاقيها مغطية نص وشها و كاشفة نص وشها !!! كإنها مترددة النقاب اللى فرض و لا الخمار ، فقالت أقف فى النص ما بين الاتنين ! لا يا جماعة النقاب النقاب الحقيقى اللى مش حطالى كحل فى عينيها ...لالالا ...النقاب اللى فيه تقوى لله سبحانه وتعالى ، النقاب الشرعى ، النقاب السليم ، نقاب أمهات المؤمنين رضوان الله عليهم

يعنى برضه فيه قول واحد يقولك هو أنهو أكثر فتنة الإيد و الا الوش ؟ الوش ده مجمع المحاسن ، طب يقولك إزاى ربنا يأمر بتغطية الإيد وكشف الوش ؟ كلام عايز يتسمع كدة وتفكرى فيه ، أنا مش عايز أضيق واسع
الفقهاء اختلفوا ، قالوا نقاب وقالوا خمار ، و إنتى أمامك اللى اتنين

و لكن يعنى بالذات فى الزمن ده والله يا جماعة و الله النقاب هو أسلم حاجة للمرأة و أسلم حاجة للرجل فيعنى هذا النوع التانى

يتبع بإذن الله ...

[طائر السنونو]

الحجاب ... الإحتجاب عن الرجال

حجاب السابقات : اللى هى تحجبت لبسا : لبست اللبس اللى إحنا قولنا عليه الخمار أو النقاب الكامل ، و تحجبت سلوكا ومعاملة و اختلاطا ونظرا

مش تمشى تكلم الأولاد فى الجامعة ! الحجاب إنك تحتجبى عن الأولاد ، تحتجبى عن الرجال سواء فى المعاملة أو فى الزى ، مش بس إنك إنتى تغطى ...لا ...

الحجاب هو الإحتجاب ، طب ليه خير صفوف النساء آخرها فى الصلاة ؟ لإنها أبعد الصفوف عن الرجالة ، و ليه شر صفوف النساء أولها فى الصلاة ؟

لإنها أقرب الصفوف من الرجالة ـ فكل ما تقربى من راجل كل ما تبقى من شر النساء وكل ما تبتعدى عن الرجال فى المعاملة كل ما تبقى من خير النساء


يتبع بإذن الله ...

[طائر السنونو]

خدى قرار ومتضحكيش على نفسك

عايزينك تخدى قرار يا أختى ، هتقولى لمامتك: يا ماما ده النهاردة كانوا بيتكلموا عن الحجاب الشرعى السليم فى الجامع ، هتقولك الحجاب الشرعى السليم إنتى هتتجننى ! ما تضيعيش شبابك ! اوعى تقولى لوالدتك إن النهاردة اتكلمنا عن الحجاب ، اوعى تقولى هذه المعلومة ، تروحى كدة تصلى ركعتين توبة لله تعهدى ربنا فيهم إنك هتكملى الناقص عندك من الحجاب

وما تقوليش الخطوة الأولى إنى أنا ألبس الأول الإيشارب اللى إيه ، و الخطوة التانية ... مافيش الكلام ده يا جماعة الخطوة الأولى خمار بجوانتى ، الخطوة التانية نقاب إن شاء الله ، الخطوة التالتة زوج طيب ومتدين و أولاد متدينين مطيعين يسعدوكى فى حياتك ، الخطوة الرابعة الجنة بإذن الله

هتقولى كدة هتتضحكى على نفسك والله و هتقفى فى الخطوة دى ، خليكى حاسمة ، إحنا مش ناقصين استعباد لشهواتنا ، و متقلوليش مراحل ، خدى قرار فورى متأجليش هذا القرار

يتبع بإذن الله ...

[طائر السنونو]

اثبتى ولا تهتمى لأى حد يصدك عن الحق

بعد كدة القرار خلاص الحمد لله ، هتقومى نازلة إنتى معاكى فلوس محوشاها بالتأكيد ، الفلوس دى تنزلى تجيبى بيها طقم واحد بس عباية وخمار أو نقاب واحد ، طب أنا ماعيش فلوس ؟! استلفى من واحدة صحبتك ، إنزلى اشترى الطقم ومترجعيش على بيتك ، ارجعى على بيت صحبتك غيرى الطقم والبسيه ، و روحى خبطى على البيت وادخلى عليهم كدة ...مفاجأة عملالكوا مفاجأة النهاردة ، طبعا أول ما هيشفوكى توقعى الحرب اللى هتقوم عليكى ، حرب عاصفة إنتى ضيعتى شبابك ! إنتى مش هتتجوزى ! إنتى كدة محدش هيتقدملك ! إنتى محدش هيبصلك !

خدى بالك لو صخرة متينة حطيناها تحت حنفية بتنقط إسبوع واتنين مش هيعملوا فيها حاجة إنما شهر واتنين و سنة هيفتتوها ، اوعى تسمحى لأى كلمة إنها تدخل ودانك

"فَأَيُّ الْفَرِيقَيْنِ أَحَقُّ بِالأَمْنِ" الأنعام:81 اكتبيها وعلقيها فى أوضتك
" أَقْبِلْ وَلَا تَخَفْ" القصص:31 اكتبيها وعلقيها فى أوضتك
"وَيُخَوِّفُونَكَ بِالَّذِينَ مِن دُونِهِ"القصص:36 اكتبيها وعلقيها فى أوضتك


يتبع بإذن الله ...

[طائر السنونو]

إنتى الوقتى مجاهدة فى الله ، إنتى الوقتى ربنا من فوق سبع سماوات بينظر إليكى بفرح سبحانه وتعالى ، إنتى الوقتى يا أختى فى الله مناضلة ، إنتى اللى على الحق

مافيش واحدة تقولى طب هما لازم أطيعهم وهما أولى الأمر ؟ أمر إيه! يا أختى إنما الطاعة فى المعروف ، أمر إيه ! تفتنى الشباب فى الشارع وضيعى دينك و تقابلى النبى صلى الله عليه وسلم يوم القيامة يقولك كنتى خنجر فى قلب الإسلام و أنا كنت عيزك تعزى الإسلام بيكى ، و تقوليلى إنما تطيعى فى إيه ؟! تغضبى ربك عشان تطيعى والدتك مينفعش !!!

ثم يعنى معلش إنتى لو طلبتى منهم يعنى شنطة والا جازمة و الا حاجة ومجابوهالكيش بتعدى تعيطى اسبوعين لغاية ما يعنى ما يعملوا المستحيل عشان يجيبوها !!! عيطى اسبوعين و الله صدقا ، مش تقفلى على نفسك
طب هنحبسك ! الحمد لله "وَقَرْنَ فِي بُيُوتِكُنَّ" الأحزاب:
33ده إنتوا جيبتوها لغاية عندى ، مش هنوديكى الجامعة ! يا سلاااااااام الحمد لله اتعتقنا من التعليم والأرف بتاعوا الحمد لله ، هنحرمك من الميراث الحمد لله
قتلى شهادة و سجنى خلوة و سفرى سياحة بإذن الله ، خليكى كدة انسانة ثابتة على مبادئك خليكى انسانة كدة ذات عزيمة ، اوعى حد يهزك ، اوعى وإنتى رايحة كدة تقوم واحدة بصالك ضيعتى شكلك بقى شكلك وحش تقومى على طول ... والله بقى شكلك أجمل ، أقسم بربى شكلك هيبقى أجمل بمراحل

زى الشاب اللى يلتحى أهله يبصولوا كده شكلك بقى وحش ، والله بقى شكله أجمل وأرجل وأنضج وأحسن ، وإنتى بقى شكلك أجمل وبقى فى عينين الملتزمين أجمل وأجمل ، وبقى فى نظر الله من فوق سبع سماوات أجمل وأجمل ، فاوعى تتهزى من مثل هذه المواقف

يتبع بإذن الله ...

[طائر السنونو]

طب أنا مش قادرة ؟

خدى أسبوع أعملى فيه التالى :

1.روحى صلى ركعتين توبة ، وكل يوم تصلى ركعتين توبة ، وتدعى ربنا بتضرع فيهم إنه يعينك على نفسك
2. تسمعى كل يوم شريط عن الجنة والنار علشان قلبك يتزلزل معاهم
3.استلفى يعنى نقاب أو خمار كامل من واحدة صحبتك واقفلى على نفسك الأوضة والبسيه ، البسى كدة نقاب كامل ووشك صافى ما فيش فيه مكياج ولا حاجة ، واقفى قدام المِرايا مش حاسة إنك فرحانة ؟ مش حاسة إنك نضيفة كدة ؟ مش حاسة إنك طاهرة وعفيفة ؟ مش حاسة إنك بتقربى من ربنا ونفسيتك بتنضف وبتتطهر وبتطلعى ؟ مش حاسة إنك عايزة تكسرى الدنيا وعايزة تتقربى من ربنا أكتر وأكتر ؟ هتحسى بإحساس عمرك ما حستيه فى حياتك مش هيهون عليكى إنك تقلعيه تانى بعد ما دوقتى جماله أول مرة

يتبع بإذن الله ...

[طائر السنونو]

إبعدى عن صاحبات السوء لإن كلمة منهم تضيعك ، ابعدى عنهم تماما يا أختى ، ده أخطر قرار فى حياتك ده الرسول صلى الله عليه وسلم لما بايع المرأة إشترط فى البيعة الأول عدم التبرج ، دى ألف ب دخولك الدين ، ده إنتى كل المطلوب منك فى دينك تلت أربع حاجات ، أما تضيعى الحجاب بقالك إيه فى دينك ؟!

يا أختى فى الله اوعى تستهينى بكبيرة التبرج ، أنا عايز أفكرك تانى إن الرسول وصف المتبرجة بإنها منافقة وإنها ملعونة وإنها زإنية وإنها من جند الشيطان
"المرأة عورة ، وإنها إذا خرجت من بيتها استشرفها الشيطان ، و إنها لا تكون أقرب إلى الله منها في قعر بيتها" صححه الألبانى السلاح بتاعى اللى هدمر بيه قلوب الشباب ... جنود الشيطان والعياذ بالله ، وإنها ليست من أهل الجنة ولن تقرب الجنة وإنها من أهل النار مستنية إيه عشان تنجى من كل الكلام ده ؟!

مستنية إيه ؟!

[نضال 3]

بسم الله موسوعة رائعة جدااا

جزاك الله خيرا ااستاذنا طائر

لروعة هذا الطرح القيم

جعله الله فى ميزان حسناتك

واسجل متابعة